2358/2026-2027
Aizawl dated 25th September 2026: Corporate Social Responsibility Cell, Government of Mizoram leh Confederation of Indian Industry (CII), Mizoram State Council tangkawp chuan vawiin khan Aijal Club-ah ‘CSR Conclave Mizoram 2026’ an buatsaih a. Conclave hawnna hun ah hian Pu Lalnghinglova Hmar, Minister of State, Labour, Employment, Skill Development & Entrepreneurship Department chu khuallian niin, India ram hmun hrang hranga Company aiawhte, PSU, Mizoram Sawrkar hnuaia Department hrang hrang aiawhte leh NGO aiawh mi thahnem tak an tel a ni.

Khuallian Pu Lalnghinglova Hmar chuan Mizoram chu inkalpawhna ah hma kan sawn hle tih sawiin, India ram khawpui lian atang chuan thlawhtheihna hmangin hun rei lote chhungin Mizoram chu a thlen theih tih a sawi a. Company lian tak tak te chu CSR hmanga Mizoram ti hmasawn tura thawktu ni tura a sawm bakah, Mizoram chhunga leilung hausakna hrang hrang awmte rawn bel chiang turin leh, heng hausakna hmang hian ram ti hmasawn tura an thiamna leh theihna hmang chhuak turin a chah bawk a ni.

Minister Pu Lalnghinglova Hmar chuan Mizoram chu leilung hausakna piah lamah thalai infiamna hrang hranga theihna tha tak tak nei tamna state a nih thute, Entrepreneurship lama theihna nei tha, ziak leh chhiar thiam tamna State a nih vangte hian, hmabak eng tak a nei meka a hriat thu a sawi a. Heng hmasawnna kawng chak lehzuala sat kaw tur hian CSR kaltlangin Private Company lian tak takte, Mizoram Sawrkar hnuaia Department hrang hrangte leh mipuite kan thawhho a pawimawh thu a sawi a. Ruahmanna tha tak hnuaia CSR kalpui a nih chuan Mizoram khaw hrang hranga zirlaite, infiammite, kuthnathawktute, Entrepreneurs-te tan hmasawnna kawng zau zawk hawn sak an nih phah theih thu a sawi a. Kum 2047-a hmasawnna tluantling nei tura India a inbuatsaih mekna,’ Viksit Bharat’ tih hlawhtlinna kawng pawimawh tak a nih bawk tur thu a sawi.

Pu Lalnghinglova Hmar chuan India State dangte nen khaikhin chuan Mizoram chu CSR dawng tlem berte zingah an tel thu a sawi a. Company lian tak takte chuan Mizoram leh a chhunga cheng mipuite tana hmasawnna thlentu ni turin CSR-te Mizoram tan hmang ve ngei turin a sawm a ni.

Pu TBC Lalvenchhunga, Chairman, CSR Cell chuan Mizoram tih hmasawn nan CSR chu tangkai taka hman a nih theih nan Chief Minister kaihhruaina hnuaiah CSR Cell din a nih dan a sawi a. CSR Cell leh Confederation of Indian Industry hruaitute hmalakna zarah ‘CSR Conclave Mizoram 2026’ kaltlangin Company aiawhte, Sawrkar department aiawhte leh NGO aiawhte inkawmna hun tha tak buatsaih a ni chu lawmawm a tih thu a sawi.
Pu TBC Lalvenchhunga chuan India state dangte ruala hmasawnna hmel hmu ve zel turin Mizoram pawh a inbuatsaih tih sawiin, hemi kawngah hian CSR hi tangkai taka hman tum a nih thu leh Company lian tak tak ten Mizoram hi investment lian tihna tlak a nih zia hre turin a chah bawk a ni.

CSR Conclave Mizoram 2026 hawnna hunah hian Dr. Lalrintluanga Jahau, Chairman, CII Mizoram chuan kalkhawmte lawmna thu a sawi a. Pu David Lalthantluanga, IAS, Secretary, Planning & Programme Implementation Department chuan CSR Conclave 2026 chungchang sawi hawnna neiin Pu Henry Malsawmtlanga, Addl. PS to Chief Minister chuan lawmthu sawina hun a hmang a ni.

CSR Conclave Mizoram 2026-ah hian Sawrkar Department-a thawktute tan leh NGO aiawhte tan CSR chungchanga thupui hrang hrang hmangin inzirtirna leh sawihona hun neih a ni a. CSR tangkai taka lo chhawr tawhte hnen atangin ‘Experience Sharing’ hun neih a ni bawk. Corporate Social Responsibilty (CSR) hi Company-in a sumdawnna atanga hlawkna a neih dan a zirin, khawtlang tih hmasawnna tur atana ‘Companies Act 2013’-in mawhphurna a pek a ni.