3836/2022-2023

Lunglei the 14th March, 2023 - Lunglei District, Mizoram atanga Lung lam thalo zai zawh tak Naupang 5, leh anmahni kalpui tu mi 6 te chu hlawhtling taka Sri Ramachandra Medical College and Research Institute, Chennai ah zai zawh an nih hnu in ni 12.03.2023 khan Aizawl lam Indigo flight in an rawn haw a. Nimin13.03.2023 khan Lunglei tluang taka lo thlengin Lunglei Deputy Commissioner Pi Ramdinliani chuan Lunglei DC Bangla ah zanriah a buatsaih sak a ni.

Hemi puala lawmthu sawina inkhawm tawi neihah Lunglei Deputy Commissioner Pi Ramdinliani chuan damlo leh anmahni hruai tu te awmpuia venghim tlat tu Pathian hnenah lawmthu sawiin, damlote phal taka sponsor tu te zawng zawng chungah pawh lawmthu a sawi a. Lungleia Free Cardiology & Oncology Health Camp neih theihna tura hma la tu ber Lunglei Deputy Commissioner chhuak ta Pu Kulothungan A inpekna leh mipuite a hmangaihna chu a fakawmin a entawntlak takzet a ni tiin a hnathawh ropui tak tak te Lunglei District mipuiten kan hre reng dawn a ni, a ti a. Damlo zai tawk te chu uluk taka inenkawl chhunzawm a, doctor ten damdawi an chawh te a hun tak ngeia ei thin turin a chah bawk a ni.

He hunah hian damlo hruaitute atangin report te ngaihthlak niin Pathian hnena lawmthu sawina hunserh an hmang bawk a ni.

CSR kaltlanga Free Clinic hi Dr. J S N Murthy, Senior Cardiologist & Head of Cardiology, Sri Ramachandra Medical College and Research Institute, Chennai leh Pu Kulothungan A, IAS te hmalaknaa neih niin Sri Shankara Heart Foundation, Mathew foundation, Muthi Trust, Renyl Foundation leh Mr. Subramaniam ten sum thahnem tak an thawh khawm a. An inzaina, damdawiina an awm man leh an kal leh haw na zawng zawng te hi a thlawn veka tih sak niin ni 90 chhung ei tur damdawi an dawng vek bawk a ni.

Heng lung thalo zai mi panga te hi mipa vek niin kum 2 – kum 14 inkar an ni a, zai an nih hnuah an dinhmun a tha chho viau a ni.