858/2022-2023
Lunglei 10th June 2022 : Zirlai ten Saptawng a bulthum atanga an zir theihna tur English Language Forum (ELF) English Programme, chu ELF Learning Solutions Pvt Ltd, Chennai kaltlangin CSR cheng nuai 12 hmangin Lungleiah bultan a ni.

Lunglei Bawrhsap Pu Kulothungan A, IAS chuan he hmalakna thar hi vawiinah a hawng. He hmalakna hnuaiah hian Lunglei District chhunga sikul 61 thlan chhuah atanga primary sikul naupang 3000 ten English an zir dawn a ni.

ELF English Programme hawnna DEO Conference Hall-a neih hi Lunglei District Education Officer Pu KC. Lalrinmawia'n a kaihruai a, Lunglei DC Pu Kulothungan A chuan hawnna thu sawiin Lunglei District chhunga zirlai 3000 zetin ELF English Programme kaltlanga zirna an hmang tangkai thei tur chu lawmawm a tih thu sawiin zirtirtute pawhin he saptawng zirna kawngah hian inthlahdah lova training tul ang angte pawh hlen chhuak zel turin a ngen a ni.

Pu Kulothungan A chuan ELF online hmanga saptawng zirna chu a tuipui hle tih sawiin an hunlaia English zirna an hmuh that tawk loh avanga harsatna an tawh thu a sawi a, programme tha zawk leh changtlung zawk ruahman a ni ta chu naupangte tan malsawmna a nih a beisei thu a sawi a. DEO leh a thawhpuite pawhin he zirna hi an la thutak hle tur a ni tih sawiin harsatna a awm a nih pawha DC Office ah thlen thin turin a chah a. CSR phal taka ruahman tu ELF Learning Solutions Pvt Ltd, Chennai te chungah lawmthu a sawi a ni.

DEO Office atangin Pu Joseph Lalngaisanga Chhakchhuak chuan ELF English Programme kalpui dan chung chang sawiin Lunglei DC hmalakna atanga bul tan a nih thu a sawi a, Lunglei District chhunga sikul 61 thlan chhuah atanga naupang 3000 ten an zir theih dawn thu leh heng sikul thlan bik atang hian ELF English Programme zirtirtu tur mi 72 thlan chhuahte chu thla 3 chhung training pek an nih dawn thu a sawi a ni.

Pu Ajinkya Madkaikar, MGNF, DC Office Lunglei pawhin tlangkawmna thu sawiin online hmanga ELF English zirna chu Lungleiah bul tanna a nih avangin zawhna leh hriatthiam loh tam tak a awm dawn a, zirtirtute inthlah dul mai lova, a tul apianga pui tura an awm reng thu a sawi a, thawh hona tha tak nen naupang ho ten hmasawnna an neih zel theih nan ke pen ho a tul thu a sawi a ni.

Vawiina ELF English Programme hawnna ah hian sikul hrang hranga zirtirtu thlan bik te kal khawmin he programme chung changa zir tur leh hriat ngai awmte an zir tan nghal a ni.