859/2022-2023
Lunglei the 10th, June' 2022: Vawiin khan Saikuti Hall Lungleiah Mizo Zirlai Pawl (MZP) Hqrs, Lunglei buatsaihin High School Leaving Certificate(HSLC) leh Higher Secondary Leaving Certificate(HSSLC) Exam a Mizo zirlai ti tha chawimawina 2022 hun hman a ni. Pu C. Lalrinsanga, Minister, Agricultur, Irrigation & Water Resources leh Co-operation changtu chuan khuallian niin a hmanpui a ni.

Mizo zirlai ti tha chawimawina hun hi Albert Lalnunpuia, Vice President MZP Hqrs, Lunglei chuan kaihruaiin Khuallian Pu C. Lalrinsanga chuan Lunglei atanga HSLC leh HSSLC Distinction a pass hlawtling te a lawmpui a, zirlaite, zirtirtute leh nu leh pate thawhrimna rah a ni a ti. Khawvel thiamna leh finna sang zelah a thiam leh a thei te din channa hmuna rawn chuang chhuak mek zirlai pass thar te chu taimakna leh tumruhna nena hmalam pan turin a fuih a ni. Zirlaite chu an tumah chiang tur leh chhawrtlak thiamna paw chhuak ngei turin leh Lunglei tan rohlu ni turin zirlaite a chah a ni. Nun uluk a pawimawh a, Pathian nena zirna kalpuitu chu a hlawhtling ngei ang a ti bawk. Mizoram sawrkar office tam takah chhim mi in nihna pawimawh tak tak an chelh thin a, chung hmun luahlum thei tura inbuatsaih a ngaih thu sawiin zirlaite hmalam hun thlirsak a thahnemngai taka zirlaite tana inpe turin zirtirtute a chah a ni. Zirna piahah an thiamna te haichhuahsak a eizawnna mumal tak kalpui theih tura chherchhuah a ngaih thu a sawi a. Kum 2023 HSLC leh HSSLC exam a Lunglei atanga top 10 a langpha zirlaite hnenah cheng nuaikhat a pek tur thu a sawi bawk.

Mizo zirlai ti tha chawimawina hun ah hian Lalpeksanga chenkual, President MZP Hqrs. Lunglei leh Sanghmingthanga, Treasurer, MZP General Hqrs. te pawh in fuihna thu an sawi a, B. Lalchhanhima, Secretary MZP Hqrs. Lunglei report a pe bawk.

Vawiina Mizo zirlai ti tha chawimawite hi mi 108 an ni a, HSLC ah mi 63 niin HSSLC ah mi 45 an ni a ni. HSLC leh HSSLC ah Lunglei atangin subject mala mark hmusang ber pahnih awmin HSLC ah C. Malsawmkimi, Sacred Heart School chuan Mathematic ah mark 99 a hmu a, HSSLC ah Lalnunpui BHSS, Serkawn chuan Georaphy subject ah mark 96 a hmu bawk a ni.