860/2022-2023

Champhai, the 10th June, 2022: Mizoram hmun dangte rualin vawiin khan Champhaiah District Level Committee on Green Mizoram huaihawtin 'Thing phun la, tuihna siam rawh' tih thupui thlan hmangin Green Mizoram Day vawi 24-na hman a ni. Green Mizoram Day thingphun hnatlang hi Pu James Lalrinchhana, Chairman, District Level Committee on Green Mizoram hova neih a ni.

He hun puala inkhawm tawi Keilungliah Tuikhuah kama buatsaihah Bawrhsap Pu James Lalrinchhana chuan Green Mizoram Day hman a nih theih nana hmunhma buatsaihtu leh ruahmanna tha tak duangtu Forest Department-te hmalakna fakawm a tih thu a sawi a. Kumin kangmei hluar hun chhunga Mizoram pum huapa kangmei veng tha lawmman pahnihna Champhai District-in a dawn thu tarlangin, kan zavaia thawhhona leh tanrualna rah liau liau a ni, a ti a. Kangmei hluar leh ven ngaih bik hun chhunga khaw hrang hrang leh Chanchinbumite thahnemngaihna fakawm tiin, tha thlah lova tang zel turin a chah a. Pathianin District mawi, sik leh sa nuam  chhuan tham min pek hi enkawl chhunzawm leh venhim kawngah mawhphurhna inchen vek kan nei a nih tih hriain tan i la thar ang u, tiin District mipuite a sawm bawk.

Bawrhsap chuan Pathian thil siam dangte venhim leh humhalh chu mihringte kuta awm a nih thu sawiin, District chhunga Silai kawlte nungchate suat nana hmang lo turin a ngen a. Tuihna humhalh turin ramngaw chereu zel tur ven leh tuihna vawnhim a tul thu a sawi bawk a. Tu leh fate tana chenna tlak ram nuam siam turin kan tum hun zel hi a pawimawh a, faina leh kan chenna leh a velte vawnhim a pawimawh a ni, a ti. Thingphun duh tawk mai lova a enkawlzui leh venhim kan ngaihpawimawh a tul thu sawiin, phun belh bakah a awmsate enkawl leh duat kawngah hma kan lak nasat a tul hle a ni, a ti a. Thingphun leh a phuntute plot pek an nih angin enkawlzui kawnga thawktha endik a nih tur thu a tarlang a. Kalkhawmte chu hmathlir thui tak nei tura chahin, nakin zela rohlu turte kan venthata kan duat a ngai a ni, a ti a. Thawhhona tha tak hnuaia hmalak a ni thin chu chhuanawm tiin, Green Mizoram Day chuan thawhhona pawimawh zia a tarlan thar leh a beisei thu sawiin, thingphun hnatlang neih tur a hawng a ni.

Pu Lalduhthlana, DFO Champhai & Member Secretary, District Level Committee on Green Mizoram chuan kalkhawmte lawmna thu a sawi a. DFO tarlan danin kumin Green Mizoram Day hian Keilungliah tuikhuah kamah thing tiak 687, New Champhai-Zokhawthar Road ah thing tiak 299 phunbelh bakah a awm sa 995 te enkawl that a ni a, Khankawn-Zotlang Road-ah thing tiak 300, avaiin thing tiak 1286 phun a ni a. Thingphun hnatlangah hian mi 868 an tel a, Hlingsi, Char, Chawmzil, Rihnim, Bung, Lumler, Theifangbar, Zuang, Khawkherh, Lenhmui, Theivawkmit, Tei, Tuipuisuhlah, Tlaizawng, Sertawk leh Chawnpui te phun a ni.

He hun puala inkhawm tawi buatsaih hi Pu F.Lalrinmuana, President Sub-Hqrs YMA (SYMA) Champhai chuan a kaihruai a. Rev Vanlalnghaka Jongte-in hunserh a hmang a. Pu C.Lalhmachhuana, SE, PHED tuihna humhalh leh ruahtui  dahkhawl pawimawhna leh Pi R.Lalnunkimi, DUDO te hnen atangin thusawi ngaihthlak a ni a. Kangmei ven kawnga hma la tha khua leh Chanchinbute hnenah Bawrhsap-in lawmman a hlan a. Kangmei veng kawngah Bungzung an ti tha bera sumfai Rs 50,000/- leh Citation an dawng a. Lungphunlian pahnihna niin Rs 30,000/- leh Citation an dawng a Hruaikawn chu pathumna niin Rs. 20,000/- leh Citation an dawng a ni. Chanchinbu hma la tha berah Lenrual chu thlan a ni a, Pasaltha pahnihna niin, Rihlipui chu pathumna a ni. DFO in thingphun hnatlang neih dan turte a sawifiah hnuah Pu Lalroruata VCP, Champhai Vengtharin lawmthu sawiin he hun hi a khar a, Green Mizoram Day thingphun hnatlangpui neih chhunzawm nghal a ni.

Thingphun hnatlang hi hmun 3; Keilungliah tuikhuah kam, Khankawn to Zotlang Road leh New Champhai to Zokhawthar Road-ah te neih a ni a. Keilungliah tuikhuah kamah Sawrkar Department 19, VC 7, NSS 2, YMA, MUP, MHIP, Champhai Nature Conservancy leh District Florist Association te an hnatlang a. New Champhai-Zokhawthar Road leh District Park Hringlang tlangah Sawrkar Department 18, 8th Assam Rifles, Champhai Nature Conservancy, Branch YMA 3- Mualkawi, Ruantlang leh Melbuk ten phun belh bakah nikum lama phun bikimlo an hnawhkhat a. Khankawn to Zotlang Road-ah Govt. Zotlang Middle School ten Sertawk kung 300 an phun bawk.

Vawiin Green Mizoram Day pual hun hmanah hian District Level Committee on Green Mizoram member-te, Sawrkar Department hrang hrang thawktute, NGO, VC, MZI, CNC, Govt. Champhai College leh Govt. GM Higher Secondary School NSS, District Florist Association leh Chanchinbumite an tel a. Thingphuntu planting agency thawk tha, enkawl zui tha leh thingphun nung tha ber hnenah nakum Green Mizoram Day-ah lawmman pek tum a ni a. Green Mizoram Day hman dan leh thingphun enkawlzui zel dan thlirletna neih tum a ni bawk.

Green Mizoram Programme hi Mizoram sawrkar hmalaknain kum 1999 atanga tan a ni a, hemi hnu hian urhsun takin District hrang hrangah Sawrkar leh NGO tangkawpin a huaihawt chhunzawm thin a, kum 2017 atang khan June ni 11 hi Green Mizoram Day atana ruat a ni a, kumin bikah chuan June ni 11 hi Holiday a nih avangin a hma ni vawiin June ni 10, Zirtawpni hian hman a ni.