857/2022-2023
Kolasib dated 10th June 2022: 'Thingphun la, Tui hna siam rawh' tih thupui a hmangin vawiin chawhma khan DC Circiut House, Kolasib ah Green Mizoram Day 2022 hman a ni a. Pu K. Lalrinliana, Minister of State, Food, Civil Supplies and Consumers Affairs, LAD leh Fisheries Department chu khuallian a ni.

Pu Lallawmawma, Addl. DC, Kolasib District kaihhruaiah hian Pu K. Lalrinliana chuan thu sawiin, 'Green Mizoram Day vawi 23-na’ pual a hun hmanna chuan kan ram neih chhun hausakna hlut nachang leh humhalh duhna kawngah hmasawnna a thlen phah ngei a beisei thu sawiin sik leh sa inthlak thleng nasa lutuk avanga harsatna lian zawk a thlen loh nan ram leilung hausakna venhim leh ram ngaw siam belh kawnga hmalak a tul takzet thu a sawi.

Pu K.Lalrinliana chuan 'Thing phun la, Tui hna siam rawh' tih thupui tihlawhtling tur chuan uar zawk a thing phun a pawimawh thu a sawi a, Sawrkar mai ni lovin mi tin mawhphurna a nih thu a sawi. Thing phunte chu a puitlin thleng a vil zui a pawimawh thu leh huan, lo, ram siam thin te pawhin ngaw zuah nachang intihhmuh a tul thu a sawi bawk a ni.

Green Mizoram Day 2022 hmanna a hian DFO Pi Margareth Lalramchhani IFS chuan report a pe a, nikum khan Green Mizoram Day pual a Kolasib Forest Division in Kolasib District chhunga thing tiak phun tura an sem chhuah zawng zawng chu 5987 a nih thu a sawi a. Green Mizoram Day Ceremonial Tree Plantation hi Regional Sports Training centre, Saidan ah Khuallian Pu K. Lalrinliana hova neih a nih thu a tarlang.

Green Mizoram Day hmanna ah hian Kangmei ven kawnga hma la tha thlan chhuan Village Council 3 hnenah lawmman hlan a ni a, Pakhatna hi Vengthar Kolasib niin Rs 50000 leh Certificate an dawng a, 2-na hi Bairabi North niin Rs 30000 leh Certificate an dawng a, 3-na hi Tumpui VC niin Rs 20000 leh Certificate an dawng a ni. Thing phun kawnga hma la tha Pu Pahlira, Lungmuat hnenah Citation hlan a ni bawk.