CSS Hindi Teacher-te hi Centrally Sponsored Scheme of Financial Assistance for Appointment of Language Teachers hnuaia rawih an ni a. Ni 18.2.2011-ah mi 1305 rawih tan an ni. Heng zirtirtute hi High School-ah mi 389, Middle School-ah mi 916 te an ni. A tirah chuan heng Hindi Teacher-te hlawh hi High School-a thawkte tan Rs 9750/- leh Middle School-a thawkte tan Rs 7500/- bithliah sak an ni a. Mizoram sorkar nawrpuina avangin Ni 1.10.2011 atangin High School a thawkte tan thla tin Rs 20,000/- leh Middle School a thawkte tan Rs 15,000/- ah tihsan a ni. Hemi hnuah pawh hian Mizoram sorkar nawrna avang bawkin Ni 1.3.2015 atangin High School leh Middle School-a thawkte hlawh hi Rs 29,000/- ah tihsan leh a ni a, an hlawh hi a vaiin Central sorkar tum vek a ni.

CSS Hindi Zirtirtute Centralin a rawih theih hun chhung hi February 2017-ah hian tawp tura tih anih avangin zirlaite leh thawktute dinhmun ngaihtuahin Mizoram sorkar chuan kum 10 dang pawtsei (extend) turin central sorkar-ah theihtawp chhuahin a nawr reng a. Chief Minister pawhin hemi chungchangah hian India Prime Minister hnenah D.O letter vawi hnih lai thawnin, kum 10 dang extension leh hlawh a dilsak tawh a. School Education Minister pawhin Union Minister MHRD Pu Prakash Javadekar chu a Office, New Delhi-ah Ni 26.10.2016 khan hmuin an thawh chhunzawm zel theih nan leh hlawh an lak thuai theih nan a sawipui a, ziakin a thlen bawk. Hemi chungchang tho hi School Education Minister hian Additional Secretary MHRD chu a Office New Delhi-ah Ni 11.11.2016 khan a sawipui bawk a ni. Secretary, School Education Department hovin Officer-ten a theih dan ang angin MHRD an nawrzui reng bawk. Heng bakah hian School Education Minister leh Parliamentary Secretary ten Ni 25.1.2017 khan Union Minister MHRD leh Secretary MHRD (SE&L) te chu an Office-ah an hmu ve ve a, an hnenah kum 10 dang an chhunzawm theih nan leh an hlawh bat pawh pe chhuak thuai turin an nawr a, a kaihhnawih Official dangte pawh an hmu nghal a ni. Ni 14.2.2017 a Aizawl rawn tlawh Union Minister, Dr Harsh Vardhan leh Pu Kiren Rijiju, Union Minister of state for Home Affairs-te a hran ve vea hmuin School Education Minister leh Parliamentary Secretary ten CSS Hindi Teacher te kum 10 dang an thawh chhunzawm theih nan leh an hlawh bat pe chhuak thuai tura tan lakpui turin tawngka leh ziakin an ngen bawk a ni.

Mizoram sorkarin theihtawp chhuaha a nawr hnuah tun dinhmunah hian CSS Hindi zirtirtute service pawhsei chungchanga sorkar laipui thuthar chu Scheme hlawkpui dan zirchianna (evaluation) nei tur rawn tirh phawt a ni. Hemi evaluation ti tur hian Awadh Research Foundation, Lucknow chu ruat an ni a, thla 3 chhunga report thehlut tura tih an ni. An report-ah hian a scheme hi Mizoram-a chhunzawm dan tur thui tak a innghat dawn a. Evaluation report hi a pawimawh dawn viau avangin Evaluation team-te hi School Education Department leh CSS Hindi Teacher-te hian evaluation an rawn tih chhunga tha tak leh lungrual taka tawiawm leh tanpui an tul hle dawn a ni.

CSS Hindi Teacher-te hi a ruaitu leh hlawh petu chu Central sorkar a ni a, hun rei tak hlawh an la thei lo hi School Education Department chuan pawi a ti tak zet a. Chuvangin hlawh an lak thuai theih nan leh a scheme Mizoram tan kum 10 dang central sorkarin a pawhsei theih nan state sorkar chuan theihtawp a chhuah reng a ni.