Mizoram CSS Hindi Teachers rawih chhunzawm leh chhunzawm loh tur chungchanga evaluation hna thawk turin sawrkar laipui Ministry of Human Resource Development (MHRD) chuan Awadh Research Foundation, Lucknow atangin member pahnih a ruat a,  April 5, 2017 khan heng mi pahnihte hian Aizawl an lo thleng.  

Mizorama District pangaah school hrang hrang tlawha evaluation hna thawk tura ruat an nih angin Awadh Research Foundation member-te hian Lunglei District chhungah school 24, Champhai District chhungah school 22 leh Serchhip District chhungah school 10 an tlawh tawh a. Tunah hian team hniha inthenin team khatin Aizawl District huam chhunga school-te an tlawh mek a, team khat dangin Kolasib District an tuam ve thung. Vawiin hian Kolasib District huam chhung school 11 zet tlawh hman an tum a ni. 

MHRD tirh third party evaluation team - Awadh Research Foundation member-te hi Directorate of School Education-a Deputy Director (Hindi) Pu Lalchungnunga, District tina School Education Department officer-te, school zirtirtute leh CSS Hindi Teacher awm remchang apiangin an tawiawm a. An evaluation report hi sawrkar laipui MHRD ah an thehlut leh dawn a ni. 

Tawng zirtirtu Appointment of Language Teacher scheme chungchangah Ministry of Human Resource Development chuan Third Party Evaluation report a ngai pawimawh hle a, an lehkha D.O No.4-3/2016-ALT dt. 7.2.2017 chuan rawih chhunzawm leh chhunzawm loh tur thuah third party evaluation report-ah Ministry a innghat dawn niin a tarlang a. School Education Department thawktu hrang hrangten Evaluation Team te hi tawimawmin hrilhfiah tul apiangte an hrilhfiah a ni.