Nimina Aizawla Board meeting neia lo kal kelek chungchanga thawktu pawl Cure International India Trust hotu 10 te chuan tukin khan Chief Minister Pu Lal Thanhawla chu a chenna inah hmuin an pawl hnathawh dante leh India ramah naupang kelek enkawlna lamah hma an lak dan te an hrilh.

Cure International India Trust hotute chuan Mizorama pawl Clubfoot Mizoram leh Health & Family Welfare Department te nen kelek chungchanga hma an lak dan te hrilhin Mizoramah naupang 50 vel in enkawlna an dawn mek thu an sawi a. Mizorama doctor ten naupang kelek te an zai dam dan leh an enkawlna te chu ram pumah a tha ber nia an hmuh thu te an sawi a. Kelek chungchanga programme leh awareness neih avangin pianpuia ke lam a harsatna hrang hrang nei ten mithiam leh doctor-te pan nachang an hriat phah thu an sawi bawk a. Chief Minister chuan Mizorama an thawhpui pawl Clubfoot Mizoram te nen thawhhona chak zawk an neih theih nan leh ram pumah naupang kelek ten enkawl damna an hmuh zel theih nan duhsakna a hlan a ni.

Cure International India Trust te hian nimin khan Aizawl Club a Board Meeting neiin an hnathawh dan, ram pumah hma an lak dan leh an kal zelna turte sawihoin an ngaihtuah a. State sawrkar hrang hrangte nen kelek tihdamna kawnga chak zawka hnathawh dante an rel bawk a ni.

Kelek, Clubfoot hi pianpui niin zai dam theih a ni a, enkawlna mumal tak nena tih chhoh chuan heng naupangte hian nunphung pangngai neiin engkim an ti thei vek thei a. India ramah hian kum tin naupang 50,000 kelek neiin an piang a. Tun dinhmunah ram pumah Cure International India Trust kaltlangin naupang 30,000 vel zai dama enkawl mek a ni a. Naupang tam zawk huam theih nan an pawl hian chak takin hma an la mek a. Medical training te leh CURE Clubfoot clinic te buatsaihin, Brace siam te leh naupang kelek ten an bun tur pheikhawk bik te siamin awareness programme te neiin hna an thawk mek a ni.

Cure International India Trust hi NGO niin Delhi ah hmunpui an nei a, an Board Member zingah hian Pu Ranjan Mathai, IFS (Retd.), Foreign Secretary lo ni tawh leh Pi Zohmingthangi Sailo te pawh an tel a ni.

Attachment

  • Loading attachment...