Vawiin chawhma dar 9:30 Am khan Siaha Police te chuan ‘Martyr Memorial Stone’ S.P. Office Main Gate bulah kum tina an lo tih thin dan angin kum khat chhunga Police mi leh sa duty laia thite hriatrengna hun “Police Commemoration Day, 2016” chu urhsun takin an hmang.

Pu Francis L. Ralte, Additional Superintendent of Police, Siaha chuan Police mi leh sa ram tana nun hlan tate sunna leh zahna lantirna Parthi ‘Martyr Memorial Stone’-a a dah hnuin Police thi tate zahna Chibai bukna Shok Shastra Party te chuan an neih zui a, Minute 2 ngawi renga dingin zahna an lantir bawk a ni. Pu Francis L. Ralte chuan thu sawiin kum 1959 October ni 21 ni a Ladakh-a Police Post China Sipaiten an rawn lak a, Police mi leh sa pakua(9) an kahlum tate hriatrengnan he ni hi ‘Police Commemoration Day’ ah India Sawrkar chuan ram pumpui-ah kumtin-a hman turin a rel a. Hemi ni zing dar 8:00 ah hian India ram State Capital-ah leh District Hqrs.-ah te Commemoration Parade neih a ni thin a ni. India ram pum a Police Duty laia thi te hming chhiarchhuak in an mahni hriatrengna leh sunna hun urhsun taka hman a ni thin a, India ram State hrang hrang ah 1.9.2015 atanga 31.8.2016 chhunga thite an vaiin mi 471 an ni a.

Kumin chhung hian Mizoram Police bikah thi an awm lo thu sawiin, Mizoram ah pawh vawiin October ni 21-ah hian Aizawl-ah leh District Hqrs.-ah te Commemoration Day Parade hi urhsun taka hman a ni a ti bawk.