India rama kelek (clubfoot) neite enkawltu pawl lian ber CURE International India Trust (CIIT) chuan nimin khan Aijal Club, Aizawl-ah international seminar an nei a. Seminar chhim tura ramchhung leh pawn atanga CURE palai rawn kal ten vawiin khan Mizoram Governor Lt Gen (Rtd) Nirbhay Sharma, PVSM, UYSM, AVSM, VSM chu a chhena Raj Bhawan-ah tlawhin Mizoram chhunga kelek neite tana hmalak dan tur an sawiho.

Governor chuan CURE ten Mizorama an hnathawh chu a fakawm hle a tih thu a sawi a, tlawmngai pawl a bik takin YMA te nena thawkho a, mipuite hnenah kelek chungchang nasa zawka hrilhhriat pawimawh thu a hrilh a. Kelek neia nau piangte chu enkawl hma chuan awlsam taka tihdam leh kea kal an harsatna sutkian sak theih a ni tih mi tam zawkin an hriat loh avangin keleka piangte chu damchhunga pianphunga rualban lovin an awm palh thei a, chuvangin tanlak ho a tul thu a sawi. Media hrang hrang bakah khawlaia lemchan (street plays) hmangte pawhin khawpui leh thingtlang khaw lamah te pawh ‘awareness programme’ nei turin a chah.

Governor nen inkawmhonaah hian a nupui Pi Jyotsna Sharma bakah CURE Clubfoot Mizoram Chairman Pi Zohmingthangi leh CURE palai 7 dang telte chu : Scott Reichenbach (USA), Operations Director, CURE International; Victor Nakah (Zimbabwe), SVP-SM, CURE International; Rev. Santosh George (India), Director, CURE India; Joselyn Martins (India), Chartered Accountant, CURE India; Ranjan Mathai (India), Director, Board Member, CURE India; Akayjminz (India), Board Member, CURE India leh Dr. Mathew Varghese (India), CURE India Medical Director an ni.