Sorkar khuahkhirh nitin mamawh thil mipui hnena semchhuah dan enfiaha lokal Central Vigilance Committee (CVC) te chuan vawiin khan State Guest House-ah NGO hruaitu hrang hrang, Consumer Union, Retailer, Carrying Contractor, LPG Distributor leh Village Council hruaitute an kawm a. Buhfai leh Gas, etc. mipui hnena semchhuah dan chipchiar takin an sawipui a ni.

 

 

 

 

CVC Member te chuan heng an thu ngaihthlakte hi uluk takin an chhinchhiah a, an thu hriat belh duh engemawzat an zawt bawk a. Rawtna leh harsatna sutkianna tura thil chi hrang hrangte an sawichhuak bawk. An Chairman Justice D.P.Wadhwa chuan state hrang hrang an tlawh atanga a thil hmuhte tarlangin Gujarat-ah chuan a enchhin nan Fair Price Shop te chu Model Shop tiin an thlak mek a ti a. Heng dawrah te hian sorkar khuahkhirh mipui mamawh thil bakah nitin eichawp mamawh hrang hrang zawrhtir phalsak an nih thu te, chutiang dawr nghaktute pawhin remchanna thui tak an neih avanga an dawrte pawh chu eizawnna tling a nih mek dan te a tarlang a. Mizoramah pawh hetiang hi tih ve remchang se a duhthu a sawi bawk.

Vawiin inkawmhonaah hian Mizoram buhfai lakluh kan kham khawp loh dan te, a quality pawh duhthu a sam tawk loh thu te, BPL List pakhat fel tak neih a tul dan te, Gas leh khawnvartuiah hralhruk a tam hle a an hriat thu te, Carrying Contractor-te tan Release Order an hmuh tlai thin chu harsatna siamtu a nih dan te sawilan a ni a. Mizoram chu tlangram chhengchhe tak a nih avangin buhfai thiar kawngah harsatna tam tak a awm theih dan leh fur lai phei chuan buhfai thiar chu thil hautak hle a nih thute CVC hnenah hian thlen a ni bawk.

Vawiin vek khan heng sorkar laipui mi pawimawhte hian Supply Godown leh Fair Price Shop te tlawhin a hmun ngeiah thil awm dan uluk takin an enfiah a ni.