Vawiin khan Ramhlun Indoor Stadium-a NEDP hnuaia “Sensitization of Drug Dealers in Aizawl City” Health Department in a buatsaih chu Health Minister Pu Lal Thanzara’n a hmanpui.
Health Minister Pu Lal Thanzara chuan damdawi zawrh chu sumdawnna dang nen khaikhin theih ani lova, mi nunna leh hriselna khawih sumdawnna rawngbawlna rilru pu chunga thawh chi ani, a ti a. Damdawi zawrh chu sumdawnna zahawm tak anih rualin miin an hmansual chuan midang nunna atana pawi khawih theihna hmanraw hlauhawm tak a nih thu leh damdawi hmandik loh (abuse) leh ruihtheih thil avanga thalai tam tak kan chan thin chu pawi a tih thu sawiin hemi kawngah hian sawrkar thawhpuia, venpui turin damdawi zuartute (pharmacy owners) chu a sawm bawk a ni.
Health Minister chuan Sawrkarin vantlang hriselna a ngaih pawimawh thu sawiin National Health Mission hnuaiah Malaria, NPCB (National Programme for Control of Blindness), School Health, Immunization, RNTCP (Revised National Tuberculosis Control Program), RCH (Reproductive and Child Health) ,IDSP( Integrated Disease Surveillance Program) leh programme hrang hrang hmanga hmalak anih thu a sawi a. Sawrkarin theihtawp chhuaha hriselna kawnga hma a lakna hlawhtling tur chuan damdawi zuartuten damdawi tha (quality medicines) an kawla damlo leh zoram mipuite tan damdawi tha an chawk luh a tul thu a sawi bawk a. Pu Lal Thanzara chuan Antibiotics Resistance venna kawngah damdawi zuartute chuan mipui tan tangkai takin tha an thawh theih thu sawiin Antibiotics mahni thu a lei tumtute hnena hralh loh ngam te, Doctor prescription tel lova antibiotics reng reng hralh lohte, dose kim lo a damdawi leitir loh te chu Antibiotics Resistance venna atan a pawimawh thu a sawi bawk a ni.
“Sensitization of Drug Dealers in Aizawl City” hi Health & Family Welfare Department Principal Director Dr. F. Lallianhlira’n a kaihruai a, “Antibiotics Resistance” tih thupui hmangin Dr. Belinda Lallawmkimi Vangchhia chuan presentation a pe a. Chawhnu lamah “Documentation & Penalty under Drugs & Cosmetics Act & Rule” leh “Role of Drug Dealers in Rational use of Drugs” tih thupuite Pu Timothy Thanchungnunga Asst. Director (F&D) Aizawl W, leh Pu R. Vanlalsiama Asst. Director (F&D) Aizawl E, hovin zirho leh a ni.
