Vawiin hi ‘Damdawi Hmansual leh Tawlhruk Do-na Ni’ atan United Nations chuan khawvel huapin a puang a; Mizoram-ah pawh he ni hi district zawng zawngah urhsun taka hman a ni. He ni puala inkhawm hi Aizawl-ah chuan Vanapa Hall-ah chawhma dar 11.00 khan buatsaih a ni a; he inkhawm hi Pi B. Sairengpuii, Social Welfare Secretary chuan a kaihruai a; Home Minister Pu R. Lalzirliana chu khuallian a ni a; Social Welfare Minister Pu P.C. Lalthanliana chu khual-zahawm a ni.
Pu R. Lalzirliana chuan damdawi hmansual leh tawlhruk chu khawvel ram dangte ang bawka Mizoram pawhin a buaipui thu sawiin, “Mizoram hi ruihhlo tawlhrukna kalkawngah kan awm a, chuvang chuan sawrkar leh tlawmngai pawl hrang hrangte hian tha thlah miah lova a do hna hi kan thawh a ngai a. Kan hnathawhte hi a sawt lo hle-in lang mah se, nunna tam tak chhanhim hna kan thawk a ni. Chutih rual chuan ruihhlo-ngaite enkawlna kawngah pawh nasa lehzual a tan kan lak a tul a, hetiang lama mi inpezo tak takte leh pawl hrang hrangte kan nei hi kan vannei hle a ni” a ti. Ruihhlo-ngaite enkawl dan tur sawt zawk leh tha zawk hrechhuak vat tura mithiamten tan an lak tul a tih thu Home Minister chuan sawiin, “Ruihhlo hian khawtlang nun chauh a nghawng lo va, kan ram leh hnam hmasawnna leh ei-bar zawnna kawng thlengin min nghawng a ni. Ruihhlo-ngaite enkawlna hmun 40 kan neih hian min zo lo mai ang tih a hlauhawm a; mithiamten inenkawlna tha zawk kan hmuhchhuah thuai a tul a ni” a ti a. He ni hmang tura pungkhawmte leh Mizoram mipuite chu damdawi hmansual leh tawlhruk do tura rilru siam thar theuh turin Pu R. Lalzirliana chuan a chah bawk a ni.
Social Welfare Minister Pu P.C. Lalthanliana pawhin thu sawiin, “Mizoram hian innghahna lungphum pathum – sawrkar, NGO te leh kohhran-te a nei a; heng thil pathumte hi tho thil ang thapa kan tanrual reng a ngai a. Damdawi hmansualna laka kan fihlim theihna turin mahni chhungkua theuhvah te, school leh khawtlangahte nasa zawka kan inzirtir leh kan inkaihhruai a pawimawh hle a ni” a ti. Ruihhlo tirem tur leh a ngawl veite enkawlna kawngah tharum aiin thinlung lam inhnehsak a pawimawh thu Pu P.C. Lalthanliana chuan a sawi bawk.
CYMA President Pu T. Sangkunga pawhin ruihhloin Mizote khawtlang nun a nghawng chhiat dan leh kan thalaite a suat nasatzia thu sawiin, YMA chuan he thil thalo hi theihtawpa a do zel tur thu leh hemi kawnga mi zawng zawngte tanrual a ngaihzia a sawi bawk.
He ni-ah hian thupui atan ‘Ruihhlo ai chuan hriselna ngaihtuah rawh’ tih chu thupui atan thlan a ni a; he ni pual hian tukin khan Aizawl khawpui chhunga Higher Secondary School-a zirlaite leh Aizawl Thunder ten kawngzawhin, kawngpui dungah thuziakte an tar a. Zirlaite tan he ni behchhan hian au-hla inphuahsiakna buatsaih a ni a; lawman dawngtute chu : pakhatna - St. Paul’s HSS, pahnihna – Govt. Republic HSS leh pathumna – Govt. Mizo HSS an ni a; lawman hi Cup leh certificate a ni a; Home Minister Pu R. Lalzirliana’n a sem a ni.Vawiin a damdawi hmansual leh tawlhruk don-na ni puala inkhawmah hian Dr. R.L Sanghluna chuan ‘Hriselna hi ruihhlo chiahpiah loh khawtlang nunah a lo intan a ni’ tih thupui hmangin thuchah a sawi a; Bal Bhavan naupangten lemchan an entir a, zaithiamte an zai bawk a ni.
