Vawiin chawhma khan Mizoram Legislative Assembly Speaker Pu R. Romawia chuan Durtlang North-ah Health Clinic Centre a hawng. He Clinic Centre hi Durtlang ‘N’ Community Hall hnuaiah khawtlangin pindan an pekah siam a ni.

Clinic hawnna inkhawm Local Council buatsaihah hian Pu R. Romawia chuan a bial chhung Durtlang ‘N’ mipuite hamthatna tur Health Department-in a ruahman chu khawtlang mipuiin an hlawkpui ngei a beisei thu a sawi a. Speaker chuan sorkar laipuiin rampum huapa mipuite hriselna ngai pawimawhin NRHM hmangin state hrang hrangah nasa takin hma a la a, Mizoramah Health Department pawhin tan a la mek a ni, a ti. Health Clinic hawn tharah hmanrua leh thawktute pawh changtlung taka neih nghal mai theih a nih loh avangin thawktute pawhin mipuite hnenah hriselna atana pawimawh inzirtirna leh inhrilhfiahna te pawh tam zawka nei turin a chah nghal bawk. Mithiamte chhut danin mihring dam rei chhan an hmuh chhuahah chuan hriselna leh thiamna (education) a inzawm tlat a, chuvangin ziak leh chhiar thiam sanna hmuna mite chuan hriselna pawh an ngaipawimawhin an damrei nge nge a ni, a ti. Sorkarin duhsak taka Clinic a din hi changtlung zawkin a la thuam zel beisei chungin mipuiten hlut thiam a, chhawr tangkai tur leh thawktute an mamawhnaa lo tawiawm zel turin Speaker chuan a sawm nghal a ni.

Chief Medical Officer, Aizawl East Dr.Lalthantluanga chuan Local Council leh tlawmngai pawl hrang hrang ten he Clinic Centre hawn a nih theihna tura tan an lakna leh bungrua leh tha tam tak an sen avangin lawmthu a sawi a. Clinic Centre-ah hian Health Worker mipa 1 dah nghal niin Health Worker hmeichhia 1 dah belh thuai a ni ang, a ti bawk. Mizoramah nausen piang hlim leh nu nau nei te thihna (infant & maternal mortality rate) ti hniam turin Health Department chuan theihtawp a chhuah mek a, hemi atan hian mipui zawng zawng tan tlan a pawimawh a ni, a ti.