Vawiin chawhnu dar 1:00 khan Serchhip DC Office tualah Dan phal lohva zawrh cigarette mante tihchhiatna hun hman a ni.

He hunah hian Pu VL Remliana,MCS, Addl. DC Serchhip chuan thu sawiin, Mipui hian sawrkar laka kan chanvo kan hriat ang hian sawrkar laka kan tih ve turte hi kan hriat thar a tul a ni a ti. Hei hi Serchhip District mai nilovin Mizo ten hma kan sawnna tur thil tul tak a ni a ti a, danin a phal loh thil khawchhak lam atanga lo kal Cigarette te pawh Pictorial Warning engmah inziak lo a ni a, heng thilte hi zawrh phal loh a ni tih hre reng chunga kan zuar lui tlat mai thin hi a pawi a ti a, Cigarette zuartute chu dan in a phal chin ang chauh zuar thei se a duh thu a sawi bawk a ni.

He hun hi Dr. Laldawngliana, CMO Serchhip chuan kaihruaiin, Pu VL Remliana, MCS, Addl. DC Serchhip chuan cigarette te hi zuk tlak tawh lo turin tuiin a leih huh a,  Dr. Laldawngliana, CMO Serchhip chuan heng cigarette bawmte hi a hal ral ve thung a ni.

Vawiin a ciggarette tih chhiat takte hi Bawm 1302 niin, Rs. 35,154 man hu a ni a. National Tobacco Control Programme Serchhip leh District Legal Metrology te tangkawpin Sec 7 – COTPA 2003 leh The Legal Metrology (Packaged Commodities) Rules, 2011, Rule 6,7,8 leh 20 te hmanga Foreign Cigarette an man niin, The Metrology Packaged Commodities Rules 2011, Sub Rules 2 of Rules 23 hmanga tihchhiat a ni.

He hunah  hian Anti Tobbacco Squad members te,Legal Metrology Staff  te leh National Tobacco Control Programme Serchhip Staff te an tel a ni.