Environment & Forests Department bultumin Association for Environmental Preservation (ASEP) General Headquarters, Aizawl chuan Mizorama a vawikhatna atan Millenium Centre Atrium ah Birds Photo Exhibition, 2016 a buatsaih a. Environment & Forests Minister Pu Lalrinmawia Ralte chuan a duh apiang tana en theih turin vawiin khan a hawng.

Exhibition hawngtu Pu Lalrinmawia chuan a tum khatna atana Birds Photo Exhibition buatsaih a ni ta chu Mizoram tan hun danglam leh hlu tak, hriatreng tlak a nih thu leh ASEP hmalakna a hetiang buatsaih a lo ni ta hi lawmawm a tih thu sawiin “Ram changkang zawkten an tih anga silai hmang lova thlalakna - camera hmanga kan ram sava mawi tak takte thlalak, Zofate kutchhuak ngei kan nei thei ve ta leh an thlalak hmuhnawm leh duhawm tak tak phochhuaha a awm hi kan ram tan nungcha humhalhna kawnga hmasawnna rahbi pawimawh tak min chuan kaitirtu a ni a. Rim tak leh sum tam tak senga hetiang thla latute hi an chhuanawm tak zet a, kan ram tan an hlu em em a ni” a ti a. Hetianga kan ram savate ngei thlalak thangthar lo la awm zel turte hmuh theih tura vawn that a lo ni thei turte hi ram tan a hlu tak zet in a la hlu deuh deuh zel dawn . Zofate thinlungah nasa takin thu sawi se, ramngaw leh nungcha humhalhna kawnga rilru thar siam saktu lo ni rawh se,” tiin exhibition chu a hawng a ni.

ASEP President K. Lalmuansanga pawhin, he exhibition hi inelna leh thlalak intihsiakna lam ni lovin Conservation leh Awareness chu buatsaih a nih chhan bulpui ber a ni a. Heng thlalakte hian mi dangte thinlungah nasa takin thu a sawi ngei ang tih a beisei thu sawiin Exhibition a lo hlawhtlin theihna tura thlalak frame thawhtute chu fak in lawm thu a sawi a. “Tun hi a vawi khatna a ni a, theih ang angin ASEP chuan buatsaih chhoh lehzel pawh a turn dawn a, Ram changkang zelah miten an ram nungcha hlu tak takte silaia kap mai lovin thlalakna nen an chanchinte zirchiangin an bei mup mup reng a, kan ram pawhin chutiang ti ve tura ke kan pen chho ve ta mek hi a lawmawm tak zet zet a ni,” tih a sawi ve bawk.

ASEP chuan Zoram mipui zawng zawngte he exhibition chhim ve tur hian a sawm a. Mahni ram thil ngei ngaihhlutna chang hriat a, an hlimthla mawi tak takte pawh khawvel mithmuha phochhuah duhna thinlung tak tak nei turin Zoram mipuite an ngen.