Vawiin chawhnu dar 3.00 khan UD&PA Minister Pu Zodintluanga pisa-ah Dawrpui Multipurpose Centre sak dan tur chungchangah meeting pawimawh tak neih a ni a; he meeting-ah hian Education Minister Pu Lalsawta te; Health Minister Pu Lalrinliana Sailo te, Deputy Speaker Pu John Rotluangliana te bakah Health Secretary Pi Esther Lalruatkimi te, PWD Chief Engineer Pu Vanlaltluanga leh Revenue Director Pu R. Zarzosanga te an tel a ni.

He meeting-ah hian Dawrpui Multipurpose Centre chu a Veng neitute mai bakah Mizoram mipuiten tangkai taka an hman theih tur a nih avanga Mizoram sawrkarin a ngaih pawimawh thu Pu Zodintluanga chuan a sawi a. Chief Minister Pu Lal Thanhawla hova meeting-in he ruahmanna hi tihhlawhtlin thuai tura thu a lo dah bawhzuia vawiina meeting chu koh a nih thu pawh Sports Minister chuan a sawi lang bawk.

Dawrpui Multipurpose Centre sakna tura ruahmanna lailawk, sum senso tur cheng vaibelchhe 8 aia lian leh changtlung zawka sak chu he meeting hian tha a ti a; chumi tur chuan Sports Department hnuaia Multi-Level Car Parking & Office Complex sakna tura ruahmanna awm mek leh a sum senso tur cheng vaibelchhe 14 pawh awm sa diam chu helai hmunah hian din ni se tiin meeting chuan a rel a ni. Ruahman lawk dan chuan helai hmuna in sak tur hian – motor parking chhawng engemaw zat te, khawtlang tana hman tur chhawng 1 leh Auditorium changkang tak te bakah basket-ball khelhna turte a huam dawn a ni. Building sak hna hi tan thuai a nih theihna turin a ram thut chin tur tehfel hna pawh naktuk chawhma dar 11.00 khian Health Department te, Revenue Department leh Dawrpui Local Council ten an thawk nghal dawn a ni.