Vawiin khan DC Conference Hall-ah Kolasib DC Pu H. Lalengmawia, IAS, leh Kolasib SP Pu C. Lalzahngoa leh Kolasib a Department hrang hrang hotulu te chuan February ni 25 a Mizoram Larsap Lt. Gen. (Retd.) Nirbhay Sharma, PVSM, YUSM, AVSM, VSM (Retd.) in Kolasib a lo tlawh turah amah lo dawnsawn dan tur sawihoin meeting neih ani a. Meeting ah hian DC leh SP chuan amah lo hmuah dan tur leh ama puala programme an lo ruahman lailawk te chu tarlangin chipchhiar takin ruahmanna te hi sawizau ani a. Meeting-ah hian Department officer te bakah tlawmngai pawl leh NGO hruaitu te pawh an tel a ni.

Pu H. Lalengmawia chuan Larsap chu mithiam leh thil hre tak anih avangin zawhna a neih pawha chhang thei turin Department hotulu te inpuahchah turin leh an Department hmalakna te chiang taka hre nawn turin a chah a ni.

Ruahman dan chuan Larsap hi Circuit House-ah hmuah a ni dawn a, chumi zawha hun reilo te Department hotulu te nen inkawmna hun neih a ni anga. Hemi hnu hian ama pualin Diakkawn YMA Hall-ah welcome programme buatsaih a ni ang a, Serlui B Hydel Project pawh tlawh tura beisei a ni.