Vawiin Chhun Dar 12: 30 PM khan Pu Kannan Gopinathan, IAS, Deputy Commissioner, Aizawl chuan Veterinary Department, College of Veterinary Science & Animal Husbandry, (CVSc & AH) Selesih leh GM Farm Selesih hotute ko khawmin tunlaia Porcine Reproductive & Respiratory Syndrome (PRRS) leng mek chungchanga hmalak dan tur an sawi ho.
He hunah hian Myanmar leh Champhai atanga vawk lak luh chu theih tawpa dan chah rih a nih thu District Veterinary Officer Pu RC. Lalmuana chuan a sawi a; District Administration lam pawhin a tul angin khapna thupek an chhuah ang. AH & Vety Department chuan district hrang hrang Vety Officer leh staff te pualin PRRS chungchang awareness campaign naktip ni 12.5.2016 hian a buatsaih dawn a.
Aizawl DC chuan he campaign programme huna sem atan leh district chhunga Village Council zawng zawng hnena sem atan PRRS Awareness pamphlet buatsaih turin Vety College, Selesih hotute chu a ngen a ni. PRRS natna lang chhuak emaw rinhlelh thil thua zawh duh nei tan Dr. Zarzokima, Vety Hospital, Aizawl (PH: 9436143960) leh Pu Tridib Rajkhawa, Head of Dept., Veterinary Pathology Department, Vety College, Aizawl (Ph; 8415066546) te chu biak theih an ni. Aizawl DC chuan PRRS natna hi ram dang atanga vawk lak luh atanga kai thin a nih avangin, he harsatna sut kian nana pawimawh em em chu ram dang atanga vawk lak luh ngai lova kan intodelh hi a ni tih sawiin, kan rama vawk tam zawk kan intodelh theih dan tur leh hmalakna kalpui mek te sawi ho a ni bawk.
Pig Multiplication Farm Selesih ah hian Mega Seed Project on Piggery kalpui mek niin tun kum tawp lama puitling mai tur vawk la 38 enkawl mek an ni a. Artificial insemination atana hman tur semen production pawh theih tawpa kalpui mek a nih thu Manager, Selesih Farm chuan a sawi. Vety College ah hian Distance Education Programme hnuaiah Vawk vulh zirna 3-months Free Training Course on Piggery neih thin a ni a. He programme ah hian NLUP beneficiary (piggery trade) zawng zawng te an tel theih nana hma lak tum a ni bawk.
College of Veterinary Science & Animal Husbandry, Selesih chuan Department of Biotechnology (DBT) tanpuinain an project “Techno-Economic Empowerment of Rural Women through Sustainable Pig Production Units” Kolasib District a hlawhtling taka an neih tawh chhunzawm nan Aizawl District chhung khaw sawmah an buatsaih leh mek a, he project ang hi Aizawl chhunga Sansad Adarsh Gram Yojna (SAGY) hnuaia model village thlan chhuah khaw sawm dangte tan proposal buatsaih ve turin CVSc &AH, Selesih hotute chu a ngen bawk a ni.
