Association For Voluntary Blood Donation (AVDB) Silver Jubilee lawmna vawiina Synod HSS Hall, Mission Vengthlang, Aizawla neih chu Health Minister Pu Lal Thanzara’n a hmanpui.
AVBD hian hma a sawn nasa em em a, India ramah Mizoram chu ti tha 10 thlan chhuah zingah kan tel a, hmarchhak state zingah phei chuan a ti tha ber kan ni tiin khuallian Pu Lal Thanzara chuan AVBD in Silver Jubilee hial lawm theia an awm leh he pawl in hma a sawn zel na ah lawmmawm a tih thu sawiin he pawl hi hlawkna tura din a ni lova, mite tana malsawmna ni tura din a ni zawkin, a kristian em em a ni, a ti. A thlawna thisen pek hi khawvel huapin uar zel ila, intihhmuh bawk ila, keimahni thisen ngei hi damlote hian an mamawh a, thisen mamawh petu nei mai lo te hman tur a thlawna pek khawm avangin nunna chhanhim theih a ni a. Rikrum leh chhiatrupna thleng palh ah te Blood Bank-ah thisen a awm reng a ngai a, chuvang chuan regular taka thisen hi pek a ngaih thu a sawi.
Thisen kan pek hian Doctor-te leh Nurse-te ka va tanpui mai a ni lova, damlo leh kan thenawm khawveng mi mangangte kan pui zawk a ni tiin Health Minister chuan thisen pekna kawngah nasa zawka tan lak a ngaih thu a sawi a. Voluntary Blood Donation hi Mizo tlawmngaihna leh Kristian nun nen pawh a in rem a, midang te nun chhan nana thisen pe tur chuan keimahni pawh kan hrisel a ngai a, in enkawl uluk pawh a tul, chuvang chuan regular taka thisen pe tu chu a taksa a hrisel fo thin, a ti a. AVBD pual atan hian Health Minister chuan Rs. Nuai 3 tal ngaihtuah pui a tum thu a sawi bawk.
AVBD leh NSS Synod HSS te buatsaih vawiina Silver Jubilee lawmna hi Pu PC Lalhmingthanga, AVBD President-in a kaihruai a, Upa Zonunmawia, General Secretary CKTP in hunserh a hman hnuin, AVBD-a office bearer lo ni tawhte chawimawina thuziak khuallian hian a hlan a, Dr. R. Tlangkunga, Founder President leh Principal Synod HSS ten thu an sawi a, Dr. Zoramdinthara, Vice President AVBD in lawmthu sawiin, zaithiam lar tak takte an zai.
Pu C Lalnunnema General Secretary AVBD-in report a pe a, chawhnu lamah Voluntary Blood Donation neih nghal a ni.
Association for Voluntary Blood Donation hi kum 25 kalta May 10,1991 khan Dr. R. Tlangkunga President na hnuaiah din a lo ni tawh a. AVBD thil tum ber chu thisen thianghlim tam tawk Blood Bank hrang hranga dahkhawm tura hmalak a ni a. Hemi hlawhtlinna tur hian sawrkar hmalakna tawiawmin theih ang angin Blood Bank pahnih (2) Civil Hospital leh Synod Hospital nen an thawk ho thin a. District a branch ten theih ang angin an rawn thawhpui bawk. Mizorama thisen pek zawng zawng za a za Voluntary Donation nih tir chu an tum ber a ni.
Thisen petu an lo pun zel theih nan awareness leh motivation programme an hmang a. Chungte chu Training, Seminar leh Workshop - State Level & District Level, Blood Donor’s Festival te, Local TV, Radio leh chanchinbute hmanga hemi chungchang sawihona te hman a ni thin bawk.
