No.1878/2020-2021

Dated Serchhip, the 10th June, 2020: Vawiin chawhnu hian Serchhip Deputy Commissioner Dr. Lalzirmawia Chhangte, IAS chuan DC Meeting Room ah Press Briefing neiin Serchhip District in Covid19 vei pakhat kan neih thu leh a dinhmun tlangpui a sawifiah.

Dr. Lalzirmawia Chhangte chuan Throat Swab Sample enfiahna atangin June ni 4 a lo thleng, Serchhip district mi, mi pakhat kum 35-40 inkar chu nimin lama a result lo chhuakah a positive tih hmuh chhuah a nih thu a sawi a. Tun dinhmunah a taksa lamah engmah harsatna a neih lo thu a tarlang. Bawrhsap chuan, ani hi Serchhip a rawn thlenin nawmsam lohna a neih avangin Quarantine Centre ah pawh dah lovin Isolation Centre (SIRD DPRC) ah, room hrangah, engkim hmanrua zawng zawng, toilet, bathroom leh thil dang te a hrang veka pein khunghran nghal a ni tih a sawi a. Isolation Centre a dah ve tho midang zawng zawngte Rt PCR result erawh a negative vek tih a sawi bawk a ni.

District Panchayati Resource Centre building, Isolation Centre atana hman mek chu Covid19 Care Centre atan hman zui a nih tur thu a sawi a, hei vang hian Isolation Centre a midang awm zawng zawng te chu hmun dangah sawn chhuah nghal an ni. Covid19 vei enkawltu tur team hi din nghal a ni a, damlo hi hmun danga phurhchhuah a nih loh chuan DPRC building leh a chhehvel te chu containment unit leh containment zone ah te puan zui tur a ni dawn a ni.

Dr. Lalzirmawia Chhangte chuan, kan unau lo haw te hi fimkhur taka dawnsawn vek an nih avangin mipui tan chiaina tur engmah a awm lo tih a sawi a. Chutihlaiin fimkhur lohna leh inthlahdahna avangin awlsam taka darh thei a ni a, kan invenna tha ber chu thuawi hi a ni tiin mipuite lockdown chhunga thuawi taka inkhung tlat turin a chah a. Thu belhchian dawl lo thehdarh kawnga fimkhur tura ngenin mipui tichiai thei thu diklo thehdarh chu Lungin tan theihna a ni tih hrereng turin a ngen a ni. Tin, Covid19 vei te hming leh nihna thehdarh te, thawktute leh an chhungte awm tinuamlo leh tihnual thei lam te, lo thinhrikna ang chi te chu pawi sawina a ni a, Indian Penal Code hnuaia thubuai awrh theihna a ni tih a sawi lang bawk.

Bawrhsap hi Addl. DC Pu HD Lalpekmawia, Addl SP Pu PC Laltanpuia, Dr. ZD Lalmuanawma, Medical SUperintendent, Pi C. Lalduhzuali SDO, Sadaar, Pu K. Saitluanga, DIPRO leh Pu Denny Lalchhuanawma, SDC ten an tawiawm a. Media mite hian zawhna an neih hrang hrang te zawtin rawtna an neih te pawh Bawrhsap hnenah hian an thlen a ni.