Vawiin khan Krismas leh Kumthar boruak thlirletin, Kolasib DC Pu H. Lalengmawia, IAS leh Kolasib SP Pu C. Lalzahngoa ten Kolasib a DC Office Chamber-ah meeting an nei a. Meeting ah hian Addl DC Pu R.Lalremsanga leh officer dangte bakah Excise & Narcotics Superintendent, Kolasib District Pu Z. Lalhmangaiha te an tel a ni.

DC Pu H. Lalengmawia chuan Krismas lek Kumthar vuak veta Kolasib District chhungah boruak tha leh muanawm a awm leh thil duhawm lo thleng a awmlo chu lawmawm atih thu sawiin hei hi Magistrate, Police leh Excise lam te hnathawh that vang a ni a ti a, kawng engkimah an mawhphurhna te tha taka an hlenchhuak leh mipui ten hlim leh him taka Hunpui an hman theih nan theihtawp an chhuahnaah lawmthu a sawi a. Khawtlang hruaitu, tlawmngai pawl leh Kohhran ten tha taka dan leh thupek kengkawhtute an tawiawm leh an puihnaah lawmthu a sawi bawk. He hunah hian DC chuan officer kalkhawmte chu mipuite tana thawk kan ni tih hre reng chunga mipui rawngbawlna kawnga rilru thar nen inhlan thar turin a chah bawk a ni.

SP Pu C. Lalzahngoa chuan Magistrate te nen tangkawpin Police chuan mipui ten he hun hlim leh him taka an hman theih nan kawng hrang hrangin hma an la a, chhiatna leh accident te he hun chhunga a awm lo chu lawmawm a tih thu a sawi a. November thla tawpa lam atanga motor te random checking an neih chuan rah tha a chhuah nia ahriat thu sawiin he random checking ah hian NH-54 a motor tlan 10,000 chuang an check thu a tarlang bawk.

Krismas leh Kumthar vuak vetah khan DC leh SP hian station chhuahsan lovin Kolasib ah an awm a; District chu Zone hrang hranga thenin ngawrh takin Magistrate te an duty reng a ni.