Vawiin khan Environment & Forest Department-a thawkte chuan Tuikhuahtlang YMA Hall-ah kum 2016 atana inhlan tharna hun an hmang a. Pu Lalrinmawia Ralte, E&F Minister-in a hmanpui a. Thawktu 200 chuang he inhlan tharnaah hian an tel a ni.

Mipuite hi Department chakna hnar ber an nih avangin tangruala hna thawh ho a pawimawh a, mi pakhat chauh pawhin thil tam tak a ti thei a; khawi hmunah pawh awm ila, ramngaw chereu tur ven kawngah leh thing leh mau humhalh kawngah te mi tinin tan kan la thei vek a ni tiin khuallian Pu Lalrinmawia chuan kan thawhna hmun theuhvah hian a hma aia tha zawk leh hriat reng tlaka hna thawk tur te, hmasawnna tur leh hmalakna tur tam tak zingah hma tiam fel tak neia Road-side plantation siamna kawngah te hma la tha turin thawktute chu a fuih. Department-a thawkte hian lam tang kan nei tha hle a; kangmei a chhuah thulhah pawh mahni nunna thap ngama kang thelhtu Mizo thalai an awm zel a; heti khawpa kangmei ven kawnga kan tan rualna hi department-a thawkte pawhin hrait renga vawn nun zel a ngai a ni a ti bawk.

Pu Lalram Thanga, Principal Chief Conservator of Forest he programme kaihruaitu chuan kum hluia Department-a thawkte thawhrimna zarah hmasawnna tam tak a awm avanga lawm thu sawiin, Mizoram hmun hrang hranga khaw himna tur leh chaklakna Reserve din thar leh a tul thu leh khua lo thal leh mekah kangmei laka fihlim theih nan Department-a thawktu zawng zawngte nasa leh zuala tan la turin a fuih bawk.

He inhlan tharnaah hian Mission Veng Presbyterian kohhran bialtu Pastor, Rev. F. Lalrinnunga’n hunserh a hmang a. Addl. PCCF Pu Rosiama Vanchhawng leh Pu Liankima Lailung, Chief Conservator of Forest, Planning & Development te’n thu an sawi bawk.

Inhlan tharna neih zawh hian Principal Chief Conservator of Forest Office Conference Hall-ah Officer chin tan Technical Session neih chhunzawm nghal a ni bawk.