55/2023-2024

Aizawl, the 6th April 2023 : New Delhi-a cham mek District Council & Minority Affairs Minister Pu Robert Romawia Royte chuan vawiin khan Union Minority Affairs Minister Smt. Zubin Irani a pisaah kawmin PMJVK Guidelines siamthaa Mizoram pum a scheme-in a tuam thei tawh tur chu lawmawm a tih thu a hrilh a. Hun rei tak Mizoram district 8 te chuan PMJVK hnuaia hamthatna an dawn theih loh avangin hengte cover tura Mizoram Sawrkarin projects a siamte chu ngai pawimawh turin a ngen a ni. DC&MA Minister chuan kum kal taa PMJVK sanction thar awm lo chu pawi a tih thu sawiin, India ram state hrang hrangte ang thovin Mizoram tan pawh thil hrilhhaithlak tak a ni tiin Mizoram chuan sum dawnsa tluang taka a hman theih avang leh a taka projects thawh zawh chin a san tawh avangin a bika ngaihtuah a phu a ni a ti.

Minority Affairs Minister Pu Robert Romawia Royte chuan Mizoram Sawrkarin PMJVK scheme chu tha taka a kalpui thu leh 2nd instalment sanction vat a ngaih thu a sawi a. Sanction hmuh tirh lama Covid hripui avanga hna tan muan deuh awm mahse tunah chuan hnathawh a kaltluang a, projects tam tak zawh tawh niin zawh mai tur tam tak a awm thu a sawi bawk.

DC&MA changtu Minister Pu Robert Romawia Royte chuan District Council area tan a bika project an siam thu sawiin, sanction a nih vat theih nan a tanpuina a dil bawk a, Union Minority Affairs Minister Smt. Zubin Irani pawhin theihtawp lo chhuahpui a tum thu a lo hrilh a ni.

DC&MA Minister Pu Robert Romawia Royte hian nizan khan Union Minister of State for DoNER BL Verma pawh a chenna inah kawmin Mizorama 6th Schedule area te tana a bika ruahmanna siam tul a tih thu sawiin, Union DoNER Minister chu a rawtnate a sawipui a ni.

Nizan tlai vek khan Union Minister of State for Minority Affairs Shri John Barla chu a chenna inah kawmin Mizoram mamawh hrang hrangte a sawipui bawk.

Nimin chhun khan Minister Robert Romawia Royte leh Pu C.Lalrosanga, MP te chuan Union Finance Secretary TV Somanathan pawh kawmin Finance Ministry-in a puih thinnaah lawmthu hrilhin, Mizoramin a bika ngaihtuah a ngaihna lai leh a chhante an sawipui a. Union Finance Secretary pawhin an thu thlente chu a bika ngaihtuahpui a tum thu a lo hrilh a ni.

Sports Minister hi Pu Alex V.Chawngthu, Addl. Resident Commissioner, New Delhi, Mizoram House-in a tawiawm a ni.