Aizawl District Disaster Management Authority hmalaknain DC Office, Aizawl tan khuarel chhiatna lo thlen thulha ruahmanna - "Office Disaster Management Plan" siam a ni a. He mi bawhzui hian khuarel chhiatna : a bikin lirnghing leh kangmei thlen thulha him dan tur inzirtirna (Mock Drill) chu August ni 4, 2016 khan neih a ni.
Mock Drill neih hma July ni 28 atang in uluk taka inbuatsaih lawk a ni tawh a. Directorate of DM&R nen tang hovin Quick Response Team te chu chhanchhuah hna - Search & Rescue technique leh Equipment operation leh Basic First Aid ah te practical training pek an ni. DC Office-a Officers ho te leh Branch tina Staff senior te chu Pu Lalhmunsanga Hnamte, MCS, Addl. DC leh CEO, ADD MA ni bawk chuan Aizawl DC Conference Hall ah training pein Mock Drill neih dan tur inzirtirna an nei hmasa bawk.
August ni 4 khan Mock Drill chu sawi lawk awm lovin siren hmanga ralkhel dar tih rik a ni a. Aizawl DC Office-a hnathawk zawng zawng te chu Office Disaster Management Plan-a Evacuation Plan angin mahni sahimna tur Safety Area an pan khawm a, Drop, Cover, Hold technique hmangin an insaseng a. He Mock Drill endik tur hian Disaster Management lama mi thiam, Pu Dominic Lalhmangaiha, MCS (Retd.), State Disaster Management Authority Member leh midang ten an enpui a ni.
Drill zawhah hian khuarel chhiatna laka inbuatsaihna te chu thlir ho leh a ni a, mithiam sawm bik, Observer te leh Incident Commander ten report an pe. Khuarel Chhiatna hi a lo thleng tawh thin a, a thleng mek a, a lo la thleng zel dawn bawk a ni. A hun, a hmun leh a nat zawng te a sawi lawk theih loh avangin chhiatrupna lakah kan lo him zawk nan leh hmangchang kan hriat belh zel nan Mock drill hi tangkai taka neih chhunzawm zel tum a ni bawk.
