NLUP Implementing Board, Horticulture Department leh MIFCO tangho buatsaihin nimin khan Suangpuilawn Public Playground ah “Sapthei Kut” (Passion fruit Festival) buatsaih a ni a, Horticulture Minister Pu PC Lalthanliana khuallian niin Pu JH Rothuama, Chairman, NLUP Implementing Board leh PU C. Ngunlianchunga, AH&Vety Minister te chu Khualzahawm an ni.
Khuallian Pu PC Lalthanliana chuan Sapthei Kut phena thu ropui tak awm chu kuthnathawktute malsawmna dawn leh hlawhtlinna hi a ni a ti a, mizo ten pi leh pute hun atanga kut kan hman tlanglawn Chapchar Kut, Mim Kut leh Pawl Kut bakah tunlai huna kut chi dang Sapthei Kut, Kurtai Kut, Kuhva Kut adt. Kan hman belg thei hi a ropuiin tuna kan dinhmun atanga teh chuan hei tluka kuthnathawktute tana Jubili dar hi a awm bik chuang lova, kuthnathawktute thawh rah tak tak avanga Kut chi hrang hrang kan hmang thei ta hi a lawmawm em em ani a ti bawk. NLUP beneficiary te pawh rilru dik nei tura fuihin tanpuina sum an dawn te chu vawiin atan nilovin naktuk atan ani tih hria a, vawiina hna rim tak leh thlantui luang zawih zawih a thawhtirtu anih bakah naktuka hahdam taka hlawhtlinna ropui tak nena chawlh hahdamtirtu tur ani tih hre reng turin a chah a ni. Sawrkarin New Economic Development Policy (NEDP) a duang mek a, hetah hian NLUP a tharchhuahte man man zawka hralh theihna tur ruahmanna pawh telh ani tiin Sawrkarin kuthnathawktute tharchhuah leisak vek a tum thu leh hemi atan hian tun kum kallai mekah pawh cheng vaibelchhe 27 ruahman anih thu a sawi bawk a ni.
Pu JH, Rothuama, Chairman, NLUP Implementing Board pawhin Suangpuilawn khua in Sapthei chin kawnga hlawhtlinna duhawm tak an nei chu a lawmpui thu sawiin tunhma a hmasawnna in a ramchhung hmun dang ruala a thlen phak ve loh thinna Mizoram hmar tlangdung pawh tunah chuan kawng tha tak takin a paltlang ta a, hmasawnna pawh a thang chak in hmasawn lehzual tur pawhin thawihna a awm ani a ti a, NLUP ruahman anih in Mizoramah khawchhak leh hmar lam bakah Siaha thlengin Sapthei thatna hmunah uar taka khawvel hriat tham tura ching turin hma lak tum a ni a, chutiang bawkin Lakhuihthei, Serthlum leh thlai dang dang te pawh a huhova hmun pakhata uar taka hmalak tura ngaihtuahna sen a ni a, mahse tum anga thil a kal theih tak loh avangin leh mimal duhdan te inzah tawn sak a tul nen beisei angin hma lak ani thei lova heti chung pawh hian Zoram hmun hrang hrangah hlawhtlinna duhawm tak tak hmuh tur a awm zel a ni tiin I&PR NLUP Media cell te hmalakna in heng hlawhtlinna te hi kartin zirtawp zan dar 7:00 atanga dar 8:00 inkarah Doordarshan Kendra, Aizawl ah pek chhuah thin ani a ti a, politics thil a inbeihna nasa tak karah NLUP chu that akin a kal zel ani a ti bawk. Pu Rothuama chuan NLUP hmawr bawk tan ani tawh a, chutih rualin India ram bakah khawvel pum huap pawl hrang hrang ten NLUP chu an ngaihvenpui leh an tuipui em em a, chuvang chuan a tawp hlen dawn lova, NLUP bik a tawp huna kuthnathawktute kaihhruai chhunzawm dan tur tha tak sawrkarin a duang fell eh bek tawh a ni a ti bawk.
Thusawitu dang Khualzahawm ni bawk, AH&Vety Minister Pu C. Ngunlianchunga pawhin sapthei kut chhim tura sawm ani ve chu a lawmthu mipuite hma ah a sawi a, khawvela ram changkang, mihausa leh thiltitheite hian an dinhmun hi thawhrimna avanga an hlawhchhuah a ni a, chuvang chuan Suangpuilawn mipuite pawh Sapthei Kut ah hian an hlawhtlinna tawp lo se, thawhrimna leh teirei peihna petu atan malsawmna hlu tak ni zawk se a duh thu a sawi a, Zoram khawvelah kuthnathawktute tan hmun zau tak a awm a, sawrkar pawhin kuthnathawktute thawhchhuah enliam mai mai lovin an hlawkpui theih dan tur ngaihtuahin a umzui zel a, nasa lehzualin hma lak a tum mek bawk a ni a ti a, Mizoram chawikang tur chuan kuthnathawktute an dinchhuah hmasak a pawimawh ber ani a ti bawk.
Suangpuilawnah hian a tui zual ten kum 2007 atang khan Bualhmun, Rungdil kawng leh Zawngin kawng lam mualah sapthei an ching tan a, kum 2010 ah Association din in nasa lehzualin hma an la a, an sapthei tharchhuah hi MIFCO, Chhingchhipah an hralh tlangpui a, kum 2010 khan Quintal 500 hralhin kum 2015 ah chuan Quintal 1200 lai an hralh a, kuminah hian Quintal 1500 vel tal hralh theih an inbeisei bawk. Suangpuilawna sapthei chingtute zingah hian NLUP beneficiary 79 an awm a ni.
Nimina sapthei kut hmanna ah hian NLUP 3rd Phase leh 4th Phase beneficiary te hnenah NLUP tanpuina sum pek a ni a, Line Department panga Agriculture,Horticulture, Sericulture, Fisheries leh AH&Vety Department hnuaia beneficiary ten Khuallian leh Khualzahawm te hnen atang hian an dawng a, Suangpuilawna sapthei chingtu ten sapthei zamna tur an siam nan G.I. Wire sem ani bawk.
Niminah vek hian Suangpuilawna Pauvunga Lo zawla public playground siam tur hnathawh tan nan Pu JH Rothuama’n lei a chek a, Suangpuilawn Presbyterian English School hnenah anmahni bialtu MLA Dr. H. Ngurdingliana’n Table Tennis Board a pe bawk.
Sapthei Kut puala inkhawm hi Pi B. Malsawmtluangi, MCS, BDO, Phullen RD Block in a kaihruai a, Dr. H. Ngurdingliana, MLA, Chalfilh Constituency in inlawmna thu sawiin zaipawl zai leh mal zai mawi tak tak ngaihthlak ani a, Pu C. Vanlalmuana, President, Village Council, Suangpuilawn in lawmthu sawina in hnu a khar a ni.
Kut ruai atan Sial pahnih, Vawk pariat leh Ar kg 90 talh a ni a, Suangpuilawn bakah Suangpuilawn chhehvel khua leh Aizawl atang mi thahnemtakin Kut hi an chhim a, Kut hmanna hmunah hian Carnival buatsaih anih bakah Horticulture Department, MIFCO, Suangpuilawn Passion Fruit Growers’ Association te bakah Thenzawl atang Handloom tah tu ten dawr te siamin mipui tan man tlawm zawka dawr theihin an inchhawpchhuak bawk a ni.
