KVK hnathawh rah leh thatna hi mipuiah a lang chhuak tur a ni - Pu John Siamkunga, MLA Vawiin chawhnu dar 1:00 khan KVK Lunglei District Hnahthial in Best KVK Award 2015 lawmna KVK Auditorium Hnahthial-ah hman a ni a, he hun hi bialtu MLA Pu John Siamkunga, Chairman Mizoram State Law Commission chuan khuallian niin a hmanpui a,KVK in Award an dawn chu duhtawk mai lova, an hnathawh rah leh thatna hi mipuiah a lang chhuak tur a ni," a ti.

He hun Pu Lalthansiama, Director of Agriculture (R&E) kaihhruaiah hian Rev. K. Lalnunsanga, BCM Hnahthial South bialtu in hunserh a hmang a, Dr. C. Lalremruata, Scientist (Animal Science) KVK chuan technical report pe in award dawng turin an inbuatsaih dan leh an dawn chungchang a sawifiah a, Dr. Lalmuanzovi, Senior Scientist & Head KVK Lunglei District Hnahthial pawhin an hmalakna hrang hrang presentation a nei bawk a ni.

Hemi hnu hian khuallian Pu John Siamkunga chuan thu sawiin hetiang Award an dawng thei hi a lawmawm khawm mai a, a chhan pawh a bul a\anga hrechiangtu ka nih vang a ni a, MLA ka nih tan tirh 2009 khan ka tlawh a, a tlabal hle a, chutih lai chuan tuna kan Senior Scientist hi a hotu a ni a, kan han lut a, ani hi hmalak duh tak mai, theih tawp a thahnemngai thin a lo ni a, kan han fang kual a, hmalak duh ta nafam chu hmanraw awm lo kha a mittui a tla zawih zawih mai a, theih tawp chhuahin sorkar lamah hma kan la a, tun hi kan thleng ta a, thawktute inpekna avanga Best KVK Award 2015 (Zonal) an dawng thei hi ka lawmpui tak zet a, an hmalaknaah hian kuthnathawktute nasa takin an pui a ni tih ka hria a, a lawmawm hle a ni a ti. Pu Johna chuan zirna lam hi a tui thu sawiin ITC (Integrated Training Centre) te hi MLA ka nih tirh khan kan tlawh a, a lo tlabal nasa hle a, exam hall pawh an neih loh avangin pawh chawpin an ti mai mai thin a, khawtlang hruaitute, party lam leh chanchinbu mite min tawiawm a, theih tawp kan han chhuah a, main office sakna tur te, hostel te leh quarters hrang hrang sakna a rawn kal ta zel a ni tiin, tunah phei chuan certificate course ringawt ni tawh lovin diploma course in zirtirna kan kalpui thei ta bawk a, mihring, mihringa min siamtu chu zirna thiamna hi a ni a, chutiangin Govt. Hnahthial College pawh MLA kan nih tirh khan a tlabal hle bawk.

JB College Lunglei-a amalgamate tura tih a ni a, mahse theih tawp chhuaha kan beih hnuah building tha tak tak a ding ta fur mai a, Geography Subject pawh theih tawp kan chhuah hnuah Affiliation kan hmu a, guest lecturer 3 min pe a, Asst. Professor nghet an awm loh avangin MZU lamin an enfiah a, Geography subject titawp tura tih a ni leh ta a, amaherawhchu zirna hi a pawimawh si a, theih tawp chhuaha kan beih leh hnuah tunah hian Asst. Professor nghet 2 lakna tur order a chhuak leh ta a, Geography-ah pawh session thar atang chuan admission pawh kan la thei tawh dawn a, a lawmawm tak zet a ni a ti.

MLA chuan Southern High School a tlawh thu sawiin, kan zirtir dan system hi a fuh chiah lo nge, mathematics pawh formula tel lovin kan thiamtir a, hei hi a fuh lo, formula hi an thiam ngei ngei tur a ni tiin, tunhma chuan Hnahthial hi High School-ah pawh Mizoramah kan lang ve zak zak thin a, vawiin ni a kan lan tak lohna hi a mak ka ti a, Teacher quality leh student quality kha a hrang tak tak lo niah ka ngai, Teacher quality lanna hi Student-ah a nih vang a ni a ti. Pu Johna chuan zirna lam pang hian nasa takin min kaihruai sela, chu chuan mihring hmantlakah min siam dawn a ni a ti a, a bial chhunga zirna lama a hmalak dan sawiin zirna hmanga kan inkhai chhuak a nih loh chuan, mihring kan mawl miau chuan sum pawh in pe mah ila, a ral leh mai thin a, lehkhathiam chhawr tlak kan tam poh leh hmasawnna kan nei dawn a ni a ti.

Vawiin a KVK in Award hial dawnga kuthnathawktute hmakhua ngaih vang leh chutiang lam kawnga hma an lakna zar zova, result tha tak an nei thei hi a ropui ka ti a, mihring, mihringa min siamtu Education hian mi hmantlak leh resource person kan nih theihna tura min kaihhruainaah hian thuk leh zuala kan inhman theihna tura, thuk leh zuala kuthnathawktute kaihruai zel turin a chah a, helai award mai hi ni lo, an hnathawh rah thatna Best Award hi mipuiah lang ngei se tih hi ka duh dan a ni a ti bawk.