1992/2026-2027

Dated Hnahthial, the 29^th August, 2026: Vawiin khan Hnahthial District Volleyball Court-ah DC Office leh Govt Higher Secondary School bultumin 'National Sports Day, 2026' hman a ni a, he hun hi District Sports & Youth Officer leh Sub Deputy Commissioner (SDC) ni bawk, Pu Lawrence Lalhlanthara chuan khuallian niin a hmanpui. Zirlai mipa leh hmeichhia tan Table Tennis, Volleyball leh insuknawrah te inelna awmin hmeichhia tan bik hian inkawibah hmangin inelna a awm a ni. 

Khuallian chuan thu sawiin National Sports Day lo chhuah dan a tarlang a. Mihring nunah hian duan lawk sa leh hlawhtlinna chiang sa a awm loh avangin mahni theuh hi kan thawnthu ziaktu pawimawh ber kan nih thu a sawi a. Bul tan that hi a pawimawh em em rualin a tawp khar that hi a pawimawh zawk tih kan hriat fo a tul thu sawiin kan lehkha zirna kawngah pawh hei hi kan vawn reng a tul thu a sawi bawk. 

Mizote hian infiamna kan ngainat rualin chakna leh hlawhtlinna kan chan chang hian a lawm dan kan thiam loh thin thu a sawi a, zuk leh hmuam leh ruihhlo nen kan lawm chuan hlawhtlinna sang leh hlu zawk a chan tak tak theih loh a ni tiin zuk leh hmuam leh ruihhlo laka fihlim turin naupangte a chah a. Naupangte chu infiamna lamah an tui a nih pawhin zirna thlahthlam lo turin a chah a, inelna thianghlim leh hlawhtling tak nei turin duhsakna a hlan nghal a ni. 

National Sports Day hi India infiammi ropui, Major Dhyan Chand-a piancham puala hman niin kum tin August ni 29, 2012 atang khan hman thin a ni.