Vawiin khan Kolasib District Committee on Teachers Day 2011 chu chairman Pi Niharika Rai, IAS, Dy. Commissioner hovin an thukhawm a. Kumina Teachers Day hman dan tur an rel.

Committee chuan kumin Teachers Day chu a kum 50-na, Golden Jubilee a nih avangin District pum huapa lawmna neih nise tiin an rel a. DC Pi Niharika Rai chuan thuhma sawiin Zirtirtute hi kan ram hnuk tak tak, tun dinhmuna kan nih ang min nihtirtute an nih avangin he niah hian kan theih ang tawkin kan chawimawi tur a ni, a ti a. Golden Jubilee a nih bawk avangin theihtawpa ropui a hun kan buatsaih hi a awm a ni, a ti. District pum huap Teachers Day lawmna hi St. Johns Higher Secondary School Auditorium ah chawhnu dar 2 ah neih turin Committee chuan a rel a. Hetah hian District chhunga zirtirtu zawng zawng chu tel vek tura beisei an niin District chhunga State Awardee te chu a bik taka sawm an ni bawk a ni. DC khuallian a ni ang a, Programme hmuhnawm tak tak Lemchan, Cultural Item leh Solo bakah thlanchhuahte atangin thusawi ngaihthlak a ni dawn a. Function neih hma hian school tinte chu anmahni school theuhva programme hmang hmasa tura tih an ni bawk a ni.

He hunah hian Golden Jubilee puala Ball pen siam chu zirtirtute hnenah hian hlan a ni ang a. Teachers Day puala zirtirtu damlote tanpui nana Car flag leh thildang zawrh chhuah turte chu inhawng taka lei turin Committee chuan mitin a ngen a ni.

Teachers Day pual hian DC chuan thuchah Local Cable TV kaltlangin a sawi dawn bawk a, Teachers Day pual thuchah dang a tul anga puangchhuak turin local newspaper te pawh beisei an ni bawk a ni.