Vawiin khan Chief Secretary Pu Vanhela Pachuau hovin I&PR Conference Hall-ah Mizoram State Tobacco Control Society (MSTCS) buatsaih ‘Workshop on Tobacco Control for Deputy Commissioners, Superintendent of Police & Chief Medical Officers of all Districts’ neih a ni a. District tina DC, SP leh CMO te an telkim hle.
Pu Vanhela Pachuau chuan zuk leh hmuam chu hrisellohna hrang hrang, thihpui theih natna tam ber thlentu, sum leh paiah pawh phurrit nasa taka belhchhahtu a ni, a ti. Vaihlo, tuibur leh sahdah zuara sumdawng thin te bakah vaihlo chinga eizawng te pawh mi tam tak hriselna a khawih pawizia hria a eizawnna kawng dang tha zawk dap tura zirtir a tul a ni a ti a. Ram chhunga State dangte nena khaikhinin Mizoram chu vaihlo leh a kaihhnawih zuk, hmuam leh eiching kan tam lawrlak chu pawi a tihzia sawiin a khuahkhirhna dan Cigarettes and Other Tobacco Products (Prohibition of Advertisement and Regulation of Trade and Commerce, Production, Supply and Distribution) Act, 2003 COTPA dan pawh khauh taka kengkawh ngei turin DC, SP leh CMO te a hriattir a ni.
Indian Society on Tobacco and Health (Mizoram Chapter) President Pi Lal Riliani pawhin vaihlo leh a behbawmte do leh khap thu ah tlawmngai pawl leh kohhrante an pawimawh zia sawiin an tanpuina tel lo chuan vaihlo leh a behbawm khuahkhirhna hi a hlawhtling thei tak tak dawn lo, a ti a. Dan kengkawhtu te pawh tlawmngai pawl leh kohhran te nena thawhhona tha tak siama, thahnemngai taka zuk leh hmuam dopuiah a sawm a ni.
Mizoram hi ram pumah zuk leh hmuam ti tamna ber State a ni a, a cheng zawng zawng atanga chhutin mipa 73%, hmeichhia 62% velin zuk leh hmuam an ti nia ngaih a ni. Aizawl District hi India rampuma District zawng zawngah Cancer vei tamna ber niin Serchhip District in a dawta, heng cancer natna tam tak hi zuk leh hmuam insumloh vanga thleng a ni.
Workshop hi Health Secretary Pi Esther Lalruatkimi’n a kaihhruai a. Zuk leh hmuam do kawnga District titha te hnenah lawmman hlan niin Mamit District chu a titha ber an ni a, pahnihna Champhai District, pathumna Serchhip leh Lawngtlai District, palina Lunglei leh Kolasib District te an ni.
