2397/2024-2025

Aizawl, the 5th October, 2024: Pang Zirlai Pawl (PZP), Joint Headquarters Aizawl buatsaih, zirlai tharte lawmluhna leh zirlai tithate lawmpuina hun, vawiin chawhma dar 11:00 a I&PR Auditorium, Treasury Square, Aizawla neih chu District Council & Minority Affairs (DC&MA) Minister Pu C. Lalsawivunga chuan khuallian niin a hmanpui.

Khuallian DC&MA Minister Pu C. Lalsawivunga chuan Mizorama chibil leh hnam peng hrang hrang awmte chu Mizo kan nihnain min phuarkhawm zel se a duh thu sawiin, "Inla hrang tham leh inenhrang tham kan awm lova, hetia inpumkhat leh lungrual taka kan chenho hian hnama chhiar tham leh zahawm kan nih phah a ni," a ti a. Hnam anga kan dinchhuah theih nan inunauna leh inpumkhatna dah pawimawh a tul thu sawiin, mahni awmna hmun theuhah ram leh hnam chhan nana theihtawp chhuaha rinawm leh huaisen taka hmalak a tul thu a sawi a. Kalkhawmte chu ram leh hnam intodelh ni tura tanlakpuiah sawmin, zirlaite chu ram leh hnam tan enge ka tih ve theih tih ngaihtuah ran chunga lehkha taima taka zir turin a fuih a ni.

Pu C. Lalsawivunga chuan kalkhawmte chu hnathawh hreh nei lo tur leh thawk lova awlsam taka sum lakluh tum lo tura fuihin, mahni zawn theuhah taima leh rim taka thawk tur leh a thlawna dawn leh sem ringawt beisei lo turin a chah a. Zirna chu hmasawnna rahbi pawimawh tak a nih thu sawiin, zirlai kalkhawmte chu ram leh hnam tan a ni tih hriaa thiamna tak tak nei tura lehkha zir a, central service-ahte tam zawk inziaktling thei tura tan la nasa turin a chah bawk a. Tum mumal tak nei chunga lehkha zir turte, Pathian tiha nu leh pate chawimawi tur leh thawhrimna hmanga hlawhtlin tum turtein a fuih nghal bawk.

He hun hi Tv John L. Malsawma, Vice President, PZP Joint Hqrs. Aizawl chuan kaihruaiin Rev. C. Ramsangvawra'n hunserh a hmang a, Secretary Tv Gabriel Lalchhanhima'n inhmelhriattirna hun hmangin report a pe a. PZP Joint Hqrs., Aizawl President Nl Catherine Lianhlupuii leh PZP General Hqrs. Vathuampui Asst. Gen. Secretary Tv Albin C. Lalhruaitluanga te hnen atangin thusawi ngaihthlak a ni bawk.

He hunah hian pang zirlai tharte lawmluhna neih a nih bakah zirlai titha 23 te lawmpuina thilpek hlan an ni.