2399/2024-2025

Champhai, 5th October 2024: Vawiin khan Tourism Minister Pi Lalrinpuii chuan Hnahsin Kut, Champhai a neih mek chu khuallian niin a hmanpui.

He hunah hian Tourism Minister Pi Lalrinpuii chuan sawrkar hmalakna a khualzin mite hip tumna chuan ngai neihna a thlen ṭhin thu leh hlawhtlin tawk lohna a neih ṭhin thu sawiin, Mizoram sawrkar chuan Tourism-ah kalphung thar - Community Based Tourism kalpui a tum a, sawrkar chuan mipuite hmalakna ah an hnung a dawl ṭhin dawn a ni, a ti. Hnahsin Kut buatsaih tura Champhai Nature Conservancy (CNC) te huaisenna leh Champhai mipuite thawhhona ṭha chu ropui a tih thu a sawi bawk.

Tourism Minister chuan CNC te hmathlir leh a thlawptu Champhai mipuite inpekna ropui a tih thu sawiin, Mizoram sawrkar ang leh Tourism Department enkawltu anih angin thinlung takin a lawm a ni tih a sawi a.  Hnahsin kut avangin mitinin Champhai pan an chak a, kut ṭan hma hauhva thlenna tur awm tawh lo te chuan kut hlawhtlin zia a lan tir a, kalphung thara Tourism kalpui sawrkarin a tum dan hlimthla lanna a ni, a ti.

Pi Lalrinpuii chuan Champhai District chu hmunhma tihdanglam ngai lo hmun mawi, Mizo pi leh pu sulhnu tam ber awmna anih avangin khualzin mite hip turin theihna sang tak a nei a ni, a ti a. Swadesh Darshan 2.0  hnuaiah Tourism  chawikanna tur hmalakna hrang hrang kalpui thuai tum a ni, a ti bawk. Hnahsin Kut chu mipuite phurna meichher hmangin chhit en a ni tawh a, hei aia nasa zawkin  alh zel se a duh thu sawiin Minister chuan India leh hmarchhak kut zinga ṭha ber hlankai tum turin a chah a. Hnahsin Kut chu mipuite eizawnna siam belh tu leh tourism a hmasawnna thlentu lo ni zel se tiin duhsakna a hlan bawk a ni.

Pi Lalrinpuii hian Tourism Department-in Hnahsin Kut puala North Eastern Council aṭanga an sum hmuh - cheng nuai 8 chu he hunah hian Organising Committee te kutah a hlan a. Documents a fel hunah cheng nuai 2 dang pek leh tur a ni ang.  Tourism Minister hian NEC aṭanga sum hmuh anih theih nan a thawktu - Pu TBC Lalvenchhunga, Adviser to CM leh Tourism Director Pi R. Lalrodingi leh a thawhpuite chungah te; kut hlawhtlinna tur a thawktu bialtu MLA leh mawhphurhna nei zawng zawng chungah lawmthu a sawi bawk.

Pi Lalrinpuii hian Hnahsin Kut puala Cycling Competition lawmman a sem nghal a. Lawmman dawngtute chu:

Elite Category

1. Mesak Vanlalvena

2. Peter Zohmingliana

3. T. Lalnunmawia

Junior Category 

1. Vanlalruata

2. Lalrinsanga

3. Hmingsangbera

Masters Category 

1. David Rualzakhuma

2. Gospel Lalhmingmawia

3. C. Lalnunmawia; te an ni.

He hunah hian Information & Public Relations Department leh Hnahsin Kut Organising Committee ṭangkawp ten Kut puala Painting Competition an buatsaih  lawmman pawh sem nghal a ni.

Lawmman dawngtute chu:

High School Category

1. HT Malsawmtluangi, Springdale Academy

2. Vanlalṭhakima, Govt. Hnahlan HS

3. Abisag Lalhruaithangi, Academy of Art & Scienc

Consolation: Esther Lalthanpuii & C. Lalengtluangi Corner Stone

HSS & College Category

1. Rualchhingi, Govt. GM HSS

2. Lawmsangzuali , Govt. GM HSS

3. Lalzarmawii, Einstein HSS

Consolation: Lalbiakmawii, Champhai South HSS & Lalthanpuii, Govt. Champhai College; te an ni.