1305/2023-2024

Aizawl, the 28th July 2023: Vawiin chawhma khan Secretariat Conference Hall-ah Pu Robert Romawia Royte, DC&MA Minister hovin Mizorama Autonomous District Council pathum - Mara Autonomous District Council, Chakma Autonomous District Council & Lai Autonomous District Council Chief Executive Members, Executive Members, Executive Secretaries, Deputy Commissioner, Siaha & Lawngtlai leh District Council & Minority Affairs Departments officials te chuan vawi khatna atan thutkhawm pawimawh tak an nei.

He meeting kaihruaitu, Minister Pu Robert Romawia Royte chuan DC&MA, Department pawimawh tak a chan atanga hun reilote chhunga hetiang meeting pawimawh kokim taka neih a ni chu lawmawm tiin kal khawmte chibai a buk hmasa a. ADC pathumte hamthatna tur ngaihtuahin Sixth Schedule area-a awm an nih anga an hamthatna leh chanvo turte Department leh State sorkar pawhin ngaihtuahsak a pawimawh thu a sawi a. Mizoram state sorkar, DC&MA deptt leh ADC pathum hiten hmasawn tura lungrualna leh thawhhona tha nei zel turin kalkhawmte a sawm a ni.

Pu Robert Romawia Royte, DC&MA Minister chuan ADC pathumte hnena Mizoram state-in budget atanga hlawh a pek bak development hnathawhna tur sum a awm loh avangin infrastructure development hnathawhna tur project siamin a theih ang anga sum zawn ni se ti a rawtna a siam chu uluk taka sawi ho a ni.

He meeting-ah hian Autonomous District Council pathumten harsatna hrang hrang an neihte,Gazetted Officer hnathawktu hmun ruak hnawhkhah thu-ah te, thil dang pawimawh hrang hrangte pawh sawi ho a ni a. Autonomous District Council pathumten anmahni inrelbawlna leh Mizoram sorkar inkara harsatna tam tak sawi lante a theih anga chin felpui a tum thu DC&MA Minister chuan a sawi a ni.

Pu V.Zirsanga, CEM, LADC-in DC&MA Minister kaihhruainaa an la neih ngai loh meeting pawimawh tak neih a nih avanga lawmthusawina leh hnathawktu lak chungchangah Group C & D-a harsatna an tawh loh laia Group B chung lam hnathawktu lak chungchanga harsatna an tawh thu te a sawi tel a ni.

Pu M.Laikaw, CEM, MADC pawhin tun hmaa hetianga ADC pathumte Minister-in meeting a la neihpui ngai loh thu sawiin, hetiang meeting pawimawh tak neih a nih avanga a lawmthu a sawi a, MADC ten kawng hrang hranga an harsatna tawh te a sawi.

Pu Rasik Mohan Chakma CEM, CADC chuan District Council pathumte ngaihsaka hmakhawngaitu DC&MA-in Minister an nei thar chu lawmawm a tih thu a sawi a. Group A & B officer ten eng vang pawha an hna an chawlhsanin an hmun ruak hnawhkhat tura harsatna an tawh thu te, ADC pathumte hnuaia hnathawktu nihna inangte chu hlawhah pawh inangtlang se tha a tih thu te leh harsatna hrang hrang an neihte thu te a sawi bawk.

He meeting-ah hian ADC CEM pathum, Pu M.Laikaw, CEM, MADC, Pu Rasik Mohan Chakma, CEM, CADC leh Pu V.Zirsanga, CEM, LADC te bakah EM leh ES eng emaw zat leh Dr. Lalrozama, IAS, Secretary, DC&MA, Pu Lalhmunsanga Hnamte, DC, Siaha, Pu Abraham, Lawngtlai DC charge la mektu leh official dang te an tel a ni.