Vawiin chawhma dar 11 : 00 khan DC’s Conference Hall, Saiha-ah kan hma lawk a Christmas leh Kumthar lo thleng tur chungchangah meeting neih a ni.

He meeting hi Pu John L.T. Sanga Addl. DC, Saiha chuan a kaihruaia, mipui ten hlim leh thlamuang taka he Christmas leh Kumthar kan hman theih nan Saiha khawpui chhungah Duty-na tur hmun paruk (6) siam nise, heng duty-na hmun-ah te hian duty turin Police leh Vengchhung tlawmngaipawl hrang hrang hruaitu te ruat an ni, veng hrang hranga tlawmngaipawl te chu an mahni veng theuh cheimawi turin ngen nise, Chanchinbu mite leh Local Cable TV neitu te chu Halpuah Halmawi leh hetiang lam reng reng bakah Naupang Silailem (amu hmang chi) te chu zuar lo tur leh hmang lo turin mipuite hnena atam thei ang bera thuchhuah siam tura ngen nise; tih bakah, Saiha khawpui chhung kohhran hrang hrangah pawh mipuite hnena puanzar sak tura ngenna hi siam nise tih te an rel a, Christmas leh Kumthar ruai atana hman tur rante chu mipui tan a him tawk em, a hrisel tha tawk em tih te endik turin Vety Department chu ruat a ni. He Meeting ah hian Saiha khawpui chhunga Department hrang hrang hotute, Tlawmngaipawl hrang hrang hruaitute leh Chanchinbumite an tel kim hle a ni.