Ministry of Housing & Urban Affairs hnuaia flagship programme pawimawh tak september ni 24, 2013 atanga bul tan DAY(NULM) chungchang sawiho in vawiin khan Kolasib DC Conference Hall ah Bawrhsap Pu Zoengsanga kaihhruaina hnuaiah thutkhawmna hun hman a ni.

Bawrhsap chuan Sawrkar Laipui atangin emaw State Sawrkar atangin scheme hrang hrang kalpui tur a awm thin a heng scheme te hlawhtlinna bulpui chu scheme kaihhnawiha mawhphurna nei (stakeholders) te thawhona tha ah a innghat ani tiin mahni hmazawna hna awm te rinawm leh fel fai taka kan hlenchhuah chu kan mawhphurna ani a, rinawmna leh taihmakna nena thawhhona tha kan chhawmnun chuan scheme tum bulpui ‘mipuite tana malsawmna’ chu kan thlen thin a ni a ti.

He hunah hian District Urban Development Officer Pi PC Zonuntluangi chuan DAY (NULM) a Kolasib District huam chhunga hmalakna chi hrang hrang an neih tawhte chu Power Point Presentation kaltlangin sawi zauna hun a hmang a. DAY(NULM) hnuaiah hian Component chi hrang hrang awmin, Social Mobilisation and Institution Development (SM&ID), Support to Urban Street Vendors (SUSV), Scheme of Shelter for urban Homeless (SUH), Self employment Programme (SEP) leh Employment through Skill training & Placement (EST&P) te an ni a. Heng peng hrang hrang hnuaia Self Help group, mimal bakah De-Addiction Home leh old Age home ah te kawng hrang hrangin tanpuina leh zirtirna te pekchhuah thin a ni a, vantlang inthiarna hmun te pawh hmun hrang hranga siam bawk a ni.

Hemi bakah hian Scheme of Shelter for Urban Homeless hnuaiah TNT (Khuangpuilam), Enna In (Vengthar), Home for the Blind (Vengthar), Audrene Scism Home (khuangpuilam), Observation Home (Sethawn), Hmangaihna Home (Hmunkhawhar City, Thingdawl), Hope Centre (Vairengte) leh Golgotha Camping Centre (Vairengte) ah te hian kawng/thil hrang hrang heng CCTV, Tui Connection Pipe, Gas Connection, Choka thawmthat, Solar water Geyser, tuizem etc cheng 3,22,500/- man hu tanpuina pek tura rawtna siam chu kalkhawm City Level Executive Committee under DAY (NULM) member te chuan an pawm tlang a, hei hi State level pawmpui tura thawn chhoh leh tur a ni.

DAY(NULM) hi khawpui a mi harsa zawkte tanpuina tura ruahman niin thiam thil pek/zirtir (skill development) hmanga intodelh tir tumna leh khawpuia mi harsa chenna tur in neilo leh Home thawmthat (refurbishment) te bakah khawlaia thil zuar (Street vendor) te tanpuina a ni a. Mizoram ah chuan UD&PA Department in a kalpui a, Sawrkar laipui duhdanin Mizoram State Urban Livelihoods Mission Society (MzSULM) chu October ni 30, 2014 khan The Mizoram Societies Registration Act,2005 (Act No 13 of 2005) hnuaia din fel a ni.