Information and Public Relations (I&PR) Department leh Mizoram Art Development Society (MADS) tangkawp chuan Annual Art Workshop 2019, Art Novelty Gallery Chaltlangah an buatsaih a. Ni thum awh tur he Art Workshop hi vawiin khan Pi Lallianpuii, I&PR Director chuan a hawng a ni.

Hawnna inkhawmah khuallian Pi Lallianpuii chuan thu sawiin artist-te kutchhuak painting leh sculpture te hian thu tam tak a sawi a, a entu a zirin awmze hrang hrang a nei nghal thin, a ti. Thalaite talent hai chhuahna tha tak, sual laka an nun venghim thei tu leh eizawnna hna tha siam sak theitu a ni tiin MADS te hmalakna a fak a. Sawkar pawhin artist-te thawh rah a hmuhhmaihlo tiin kum kalta lamah India International Centre, New Delhi-ah tum hnih lai Mizo artist-ten inphochhuahna hun an hmang tawh a, kuminah pawh sawrkar hmalaknain India khawpui lianah exhibition hi neih leh tum a ni, a ti. Pi Lallianpuii chuan I&PR leh MADS in art workshop an buatsaih thin chuan artist te zingah rah tha tak a chhuah tawh thin a, hmasawn zel tur an nih angin an theihna leh thiamna tuai hriam zel tur leh Mizoram chhung chauh ni lo, ram pawn thleng pawha dai darh zau zel tura rilru inbuatsaih turin Art Workshop hawnna inkhawmah hian artist-te a fuih a ni.

MADS ah hian tun dinhmunah member 84 an awm a, associate member 13 an nei mek. Annual Art Workshop 2019 ah hian artist 50 an tel a. July ni 12 thleng workshop hian a awh dawn a ni.

Hawnna inkhawm hi MADS President Pu Laltanpuia’n a kaihruai a, General Secretary Pu Vanlalhriata’n report pe in chawhnu lamah Pu Isaac Malsawmtluanga paper buatsaih an zirho a ni.