Vawiin khan Planning and Programme Implementation Department hnuaia din Mizoram Entrepreneurship Development Monitoring Committee (MEDMOC) leh Fashion Designing School of Aizawl te buatsaih ni hnih awh tur Worskhop on Entrepreneurship Development in Fashion Technology chu Economic and Statistics Department Conference Hall, New Capital Complex ah tan a ni.

Hawnna inkhawm ah hian khuallian Dr.Vanlaltanpuia, MYC Chairman chuan thusawiin Mizoram Youth Commission chu tun hma atangin lehkhathiam mi tlem te chauhin UPSC/MPSC Coaching kal nan an hmang tangkai thin a ti a, tunah chuan hei hi thlak danglam tum a ni tiin mi harsa leh thingtlang a chengte thlengin an chhawr tangkai theih turin a zau thei ang berin hmalak a ni dawn a ni a ti a. Mizo thalai te thiamna hrang hrang eizawnna tlaka chher chhuak turin MYC chuan hma ala dawn a ti a, Mizo thalai te hian platform ropui tak an la nei dawn a ti a, sawrkarin bung thar a keu dawn a ni ti.

He workshop hawnna a chairman Dr.Lalrinchhana, Secretary MEDMOC, Planning and Programme Implementation Department chuan MEDMOC hnuaia Mizo thalai te- an mahni a an dinchhuah theihna tura ruahmanna hrang hrang- Mizoram Kailawn, Mizoram Rahbi etc te sawi a, heng ruahmanna kaltlang hian Mizo thalai tam tak hnenah sawrkarin tanpuina a lo pek tawh thin thu leh vawiin a Workshop on Entrepreneurship Development in Fashion Technology a tel te pawhin an hmang tangkai thei a ni a ti a. Khawvel thang chho zelah Mizoramah ngei pawh Act East Policy te a taka hman ala ni dawn a, hei vang hian mahni kutke a dinga, sumdawnna bul tan te hian an la hlawkpui dawn a ni a ti bawk.

Workshop on Entrepreneurship Development on Fashion Technology hi fashion lama tuimi zirlai thahmen takin an chhim a, resource person atan Rashmi Agarwal, Fashion Designer, Stylist, Founder of Label Gauri & Shan, New Delhi hman a ni.

Attachment

  • Loading attachment...