Nizan khan New Delhi a The Oberoi Hotel ah Ministerial Session of 8th Delhi Dialogue on Look East Policy chu Asia Chhimchhak ram, Association of South East Asian Nations (ASEAN) te leh India aiawhte nen intawhkhawmna neih a ni a, Chief Minister Pu Lal Thanhawla chuan Mizoram leh India hmarchhak state ten hmasawnna chak zawk an neih theihna tura tul leh mamawh a tihte a thlen.

Chief Minister chuan Look East Policy hian ASEAN ramte nena inkungkaihna siamin hmarchhak state te sum leh pai leh ei leh bara an dinhmun nasa taka a vawrh chhoh thieh thu sawiin, hei hian a leilung hausaknate awmze neiin a hman tangkai tir thei a ni a ti a. Hmarchhak bial hi kawng tinrengah hmasawnna ruhrel a tlakchham avangin kum 20 chuang Look East Policy kalpui tawhah hlawkna hmuh tur a awmlo a ni a ti a. Chuvangin ASEAN ramte nen hian tui leh khawmuala inkalpawhna tha tak kan neih a tul a ni a ti.

Chief Minister chuan rawtna engemawzah thlenin, hmarchhak biala Land Custom Stations 17 awm mekte hi a ruala motor lian pahnih tal kal theihna tura kawngpui siam tul a tih thu te, Manipura Moreh te, Arunachal Pradesha Pangshu Pass leh Mizorama Zokhawthar panna kawngpui tha tak siam a tulzia te, Kolodyne Multi Modal Transit Transport System a hun taka zawh a pawimawh thu a sawi a. Heng bakah Bairabi - Sairang inkar rel kawng zawh thuai anih theihna tura chak taka hmalak leh Kolodyne Transit System pawh tura Lawngtlai thleng relkawng siam tura chak taka hmalak nise tihte a thlen a. Lui awm ang angte pawh hman tangkai nise a ti a. Bungraw phur chi thlawhna Aizawl, Imphal, Guwahati leh Agartala ah te tum theina tur dap nise tihte thlen bawkin, Dhaka, Thimpu leh Myanmar te leh hmarchhak bial inkara thlawhna thlawh tir a, hemi atana Aizawl, Imphal leh Agartala thlawhna tumhmun tih changtlun a tul thute a thlen bawk a ni.

Chief Minister hi Pu T.P.Khaund, Principal Adviser to the Govt of Mizoram leh Dr. Ranbir Singh, Resident Commissioner, Mizoram House, New Delhi ten an tawiawm a ni.