Vawiin khan Development of North Eastern Region (DoNER) Secretary Pu Naveen Verma, IAS chuan zan hnih riak turin Aizawl a rawn thleng a. Aijal club ah sawrkar mi pawimawhte nen Non lapsable central pool of resources (NLCPR) kaltlanga Mizorama hnathawhte thlir hovin meeting pawimawh tak an nei.
Mizoram sawrkara department hrang hrang ten NLCPR sum hmanga project an thawh zawh tawh zat hi 88 a ni a. Tunah hian project kallai 55 a awm. Project kal mek tan hian Rs. 57,340.85 lakhs chu pawm niin Rs.33,380.43 chu release tawh a ni. Utilization Certificate hi project kal mekah Rs.24,678.35 hu thehluh tawh a ni a, kumin chhungin DoNER in Mizoram tana pawisa release theih a la neih zat hi Rs.36 crore lai a awm a. Project thar leh kal mekah pawisa a sanction nual tawh bawk. DoNER Secretary chuan rang zawka sum release a nih theih nan sum pek chhuah tawh sa te hmang zo thuai a, utilization certificate thehlut zung zung turin department aiawh kalkhawmte a hrilh a ni. Kuminah project thar 4 an sanction tawh a. Project kal mek 12 atan sanction an release tawh bakah release mai tur project a la awm bawk a ni. Retained project awm mek zinga 34 chu DPR siam that ngai a ni a, DPR thehluh tawh approval nghah mek engemaw zat a la awm bawk.
Meeting-ah hian Mizoram Chief Secretary Pu Lalmalsawma, North Eastern Council Secretary Pu Ram Muivah, Ministry of DoNER Joint Secretary pathum - A.M Singh, V.B Pathak, J.K Sinha leh North East Rural Livelihoods Project (NERLP) Project Director H.K. Hajong te bakah Mizoram sawrkara Commissioner, Secretary, Director leh officer lian engemawzat an tel a ni.
DoNER Secretary hian naktuk hian Lunglei leh Lawngtlai tlawhin NLCPR hnuaia hmalakna hrang hrang te a hmunah a en ang a, District official te meeting a neihpui bawk ang. Pu Naveen Verma leh sawrkar laipui Ministry of DoNER atanga lokal official dangte hian February ni 20 ah Mizoram an chhuahsan dawn a ni.
