4592/2023-2024

Aizawl, 16.04.2024: Lok Sabha inthlanpui atana inpuahchana kal mekah 15.04.2024 (Thawhtanni) zan khan Zemabawk ah District Election Officer Pi Nazuk Kumar hovin vote thlak tura mipui sawmin Street Campaign neih a ni. Systematic Voters Education and Electoral Participation hmalakna in Zemabawk bazaar kawnah hian vengchhung thalai te hnenah election pawimawhna chungchang inhrilhhriatna neih a ni.

DEO Pi Nazuk Kumar chuan kalkhawmte hnenah chuan thalaite’n vote thlak leh election an ngaih pawimawh a tul thu sawiin, tun dinhmunah India ram mipui zinga a tam ber chu thalaite an nih avangin mipui sawrkarna ram kan nihna hi humhim turin thalaite hi ram ngahfak tak tak an ni a ti a. Vote neih hlutna sawifiahin, history kan chhiar chuan mi tam takin an nunna hial thap a vote an neih theih nan a hma an lo lak tawh thin dan te leh, vawiin thleng pawhin ram thenkhatah chuan vote neilo a ram inrelbawlnaah pawh telna reng reng neilo khua leh tui an awm thu te sawiin, kan vanneihna leh kan hlutna hi kan hriatchain a pawimawh a tih thu DC chuan a sawi. Mizoram chuan MP pakhat chuah kan neih avanga MP inthlan hi pawimawh ta lo riau anga ngaih na a awm theih thu sawiin, mi pakhat chauh pawh chu state hmasawnna atan mi pawimawh lutuk a nih zia sawiin MP kan thlan kawngah tih tak zetna nen vote thlak a tul thu a sawi a. DEO chuan Mizoram a inthlan kalpui dan a felfai in entawntlak a tih thu a sawi bawk.

He programme hi Pi C. Laltleipuii, Nodal Officer SVEEP Aizawl District leh SAU Director ni bawk chuan kaihruaiin, MP inthlan hnuhnung berah Aizalw khawpui chhunga vote tlak that tawk lohna - low voter turnout area zingah Zemabawk chu a tel thu sawiin, ECI in low voter turnout area a he campaign hi buatsaih tura a rawn beisei anga he programme hi kalpui a nih thu a sawi a. Aizawl khawpui chu tun MLA inthlan zawh chiah takah pawh kan Mizram a vote tla zanwg zanwg aia a hniam thu sawi bawkin, kan zavaia ka tan tlan a pawimawh a ni, a ti.

He huna hian Pu H. Rotluanga, Dinthar leh Pu John Lallawmkima, Zemabawk ten thu an sawi bawk a. Pi Lalhruaitluangi, SVEEP Asst. Nodal Officer chuan hun hi kaihruaiin, Pi Emily Lalrinpuii, SVEEP SCCT Convener chuan lawmthu sawiin hun a khar a ni.