Vawiin khan Pu K. C. Lalrinmawia, District Education Officer, Kolasib District chuan Kolasib District huam chhunga ziak leh chhiar thiam lo te chhinchhiahna survey 'Illiteracy Survey 2015 Kolasib District' an buatsaih chu DC Pu H. Lalengmawia hnenah a Office Chamber-ah a hlan a.

He Survey in a tarlan dan hian District chhungah hian ziak leh chhiar thiam lo mihring 2101(mipa 798 leh hmeichhia 1303) an awm mek a. Survey ah hian an hming leh an chenna khua te chhinchhiah vek a ni a. Kawnpui Education Block ah hian ziak leh chhiar thiam lo 423 (mipa 153 leh hmeichhia 270) awmin Kolasib Education Block ah hian ziak leh chhiar thiam lo 1678 (mipa 645 leh hmeichhia 1033) an awm mek a ni.

Tarlan tawh thin angin Kolasib District ah ziak leh chhiar thiam lo te thiam tir nan hian Kolasib DC hian Literacy Drive ngawrh taka kalpui tumin hma a la mek a. Survey hi a thawhkhatna niin a thawh hnihnaah chuan hma lak dan tur la rel leh tur a ni.

DC hian Kolasib District ah hian heng miten ziak leh chhiar an thiam theih nan kawng hrang hrangin Department hrang hrangte nen thawk hova hma lak a tum thu a lo sawi tawh thin a.Kolasib District chu District zawng zawnga ziak leh chhiar thiam awm tamna ber dinhmunah hlangkai turin DC hian theihtawp a chhuah tur thu he hunah hian a sawi a ni.