Vawiin chhun khan Disaster Management & Rehabilitation buatsaihin I&PR Auditorium-ah “Departmental Disaster Management Plan” siam dan chungchang sawihona neih a ni. He meeting-ah hian Sorkar department hrang hrang aiawh thahnem tak an kalkhawm.

Chairman Pu PC. Lallawmsanga, IPS, Principal Secretary, DM&R chuan - “Mizoram hi lirnghing nasa ber thlen thut theihna anih laiin mipui nawlpui mai bakah Sorkar department te pawhin awareness kan la nei tlem mah mah a ni”, a ti.

Sorkar laipui ruahmanna in North East pumpui hi Earthquake Zone-5 a awm anih avangin ‘kum 1897 Shillong lirnghing anga nasa lo thleng leh ta se engtinnge kan tih ang?’ tih zirhona “Mega Mock Exercise” neih tum a ni tih a sawi a. March ni 10 hian State 4 leh March ni 13-ah Mizoram leh State dang 3 ten Mock Drill hi neih tum a ni tih a sawi.

Hemi ni hian chhitrupna lo thlen thulh a Department tin ten engtia hmalak tur nge? tih inbuatsaih lawkna (Departmental Disaster Management Plan) siam dan tur sawiho a ni a. Plan hi Department engemawzat-in an siam peih tawh thu ngaihthlak a ni bawk. Hei bakah hian office tin in chhiatna thlen huna pawnlam puihna thlen hma a keimahni leh keimahni lo inbuaipui dan tur “Office Disaster Management Plan” siam theuh a tul thu leh a siam dan tur sawiho a ni bawk.