Vawiin chawhma dar 11:00 atang khan Mizoram Information Service Association chuan I&PR conference hall-ah annual conference ah hmang a. Pu Lal Thanzara, Minister of State I&PR, etc,. chu khuallian a ni.
MISA Annual conference chawhma hunah hian “Media as Custodian of Public Interest : Synergy between roles of I&PR and Media Units” tih thupui hmangin workshop neih a ni a. Rorelna tha a awm theihna tura media te pawimawhna leh hemi kawnga sorkar leh media inkara inkungkaihna tha a pawimawh zia zir ho a ni.
Khuallian Pu Lal Thanzara chuan “Information & Public Relations chu department lian ni lo mah se, sorkar hmalakna kawng tinrengah a serh zinga a mei ang niin sorkar-a a lailum luahtu a ni, a ti a. Sorkar hmalakna zawng zawng puangzartu an nih avangin media te nen thawh hona tha an neih a pawimawh hle a ni, a ti a. Sorkar leh media inkungkaihna chungchang zirhona tura MISA in workshop a buatsaih chu lawmawm a tih thu sawiin zirhona atangin thil enzui tur tam tak a awm a ni, a ti. Pu Lal Thanzara chuan Mizote hi thil engkim mai phek beih chi kan ni a; hei hian tangkaina tak a neih rualin sorkar hmalakna thenkhat mahni duh dan anga lo enpui kan ching lutuk hi ngaimawh awm a tih thu sawiin sorkarin ruahmanna a siamte ngaichang thin turin NGO te leh mipuite a ngen a. Sorkar thiltihte enfiah duh chanchinbumite tan sorkarin remchanna a siam zel tur thu sawiin Pu Lal Thanzara chuan media-ten sorkar an thawhpuinaah lawmthu a sawi a. Mizoram sorkar chuan eirukna do te, NLUP dik taka sem leh hman dik te a ngai pawimawh chhunzawm zel dawn tih a sawi bawk.
He Conference ah hian I&PR Secretary Pu C.Thatkunga pawhin MIS officer te leh media te tan lakna tur a pawimawh te tarlangin thu a sawi a. Pu Jim K.Chozah, I&PR Director chuan keynote address sawiin chanchinbumite nen thupui zirbing tura chhawp chhuah pahnih : ‘Media leh Sokar inkungkaihna’ chu Pu C. Lalrambuatsaiha Mizoram Journalists’ Association President chuan a sawi a. ‘Media-ten tunlai khawvel thu theh darhna hman tangkai dan’ tih chu Pu Mangjangam Touthang Dy. Director (M&C) PIB chuan a sawi bawk.
MISA annual conference hi Pu David L.Thangliana, President MISA in a kaihruai a. Chawhnu hun hi rorel nan hman a ni a. MISA khawmpui rorel zingah MIS tana Joint Secretary post 1 dah chungchang leh New Delhi-a I&PR Information Centre tihnun leh chungchang te chu lungrual taka passed a ni a. Heng bakah hian District huam chhunga Media kaihhnawih sorkar hmalakna ah I&PR department district office te kaltlang a thil tih ni rawh se tih te; MIS te hnathawhna atana pawimawh PR skill/film/Photography/Audio-Visual/Arts a officer te intuaihriam nan state pawna traininga intirh leh department tih changtlunna leh inrelbawlna siam thatna tur thil pawimawh dang te rel a ni bawk.
Vawiina MISA Annual conference chawhma hunah hian Central media unit hrang hrang leh Press, Cable TV, IIMC Mizoram atang te in mi thahnem tak an tel a ni.
