Vawiin khan Deputy Chief Minister Pu Tawnluia hovin Swachh Prerak Day, 2019 (Faina Thlentute Ni) Vanapa Hall-ah hman a ni a, PHED Secretary Pu Amjad Tak, IAS chuan he hun hi a kaihruai a ni.

Deputy Chief Minister Pu Tawnluia chuan thu sawiin, mahni khuaa a hmuna thawktu Swachh Grahi te leh tlawmngai pawl hrang hrang NGO te leh PHE Department a thawktu zawng zawng hnenah lawm thu a sawi a. Khawtin faina kawngah inelna thianghlim buatsaih a ni tawh thin a, Faina Hapta Sawrkarin a hman thin hun pawh a lo thleng tepa, Mizoram-ah khawpui (Notified Town)  22 leh khawpui lian City 1 a awm a, heng khawpuiah te hian khaw fai endik hna sawrkar chuan a kalpui mek a, thingtlang lam (Gramin) hi district tin pualin khawfai thlan a ni tawh a, Heng khaw fai thlan te hi October Ni 2-ah chawimawina hlan tum an ni, tiin Deputy Chief Minister chuan a sawi a. India rama chengte fai leh thianghlimna lama hmasawnna Kum 1986 ah bul tanin, Kum 2014 ah Swachh Bharat Mission (SPM) nasa leh zualin India ramah kalpui a ni a, SPM hian a tum ber chu fai leh hrisel duhna thinlung ramchhunga chengte hnena neih tir hi a ni,  tiin a sawi a. Deputy Chief Minister Pu Tawnluia chuan SPM denchhen hian PHE Department chuan Central YMA nen thawhona thuthlung pahnih- Mizorama tuihna humhalh leh  a awmsa te tihpun leh fai leh thianghlim lamah thawhona siam a ni a, he thawhhona hian hmasawnna duhawm tak tak a thlen chho mek a ni, a ti a. Pu Tawnluia chuan Fai leh thianghlimna kawngah inlungrual taka nitin hmasawn zel turin leh India rama fai ber nihna hauh thei tura tanla turin  mitinte a sawm bakah tawitheihlo plastic hmanna kawngah te pawh fimkhur lehzual turin leh lui dung leh kawr te pawh vawng fai zelturin mipuite a fuih a ni.

Swachh Prerak Day-ah hian PHED chhunga thawktute hnenah chawimawina thuziak hlan an ni a, chungte chu- Er. F.Lalsanglura (Serchhip District), Er. Netralal Jaisi (Lawngtlai District), Er. J.Kapkima (Champhai District), Er. C.Zothantluanga (Aizawl District), Er. Lalzawmliana (Mamit District), Er. Laltlanchhunga (Lunglei District), Er. H.Lallianmawia (Kolasib District), Er. H.Lalnunthanga (Siaha District).  District Co-ordinator pariat zinga titha pathum – Samuel Lallawmzuala (Serchhip District), Malsawmtluanga (Kolasib District), Julie C.Mawii (Champhai District) te hnenah chawimawina hlan an ni bawk a. Faina kawnga tlawmngaia hmala zingah Mamit District atanga New Delhi a ‘National Award’ dawngtu Pi Laltharzeli hnenah lawmpuina hlan a ni bawk a ni.

He hunah hian MLA Pu C.Lalmuanpuia, CYMA President Pu Vanlalruata leh district tin a tanga faina kawnga hmalatu tlawmngai pawl hrang hrangte an tel bawk a ni.

India ram state 29 zingah, pawn a ‘e’ awm lo (ODF)-ah Mizoram chu Kum 2018-ah 14-na a puan a lo ni tawh  a ni.