Nu nau pai, nau pawm leh nausente'n chaw tha an tlakchham avanga an hriselnain a tawrh thin  tihtlem a nih theih nana sawrkar laipui hma lakna hnuaia beihpui thlakna, Rashtriya Poshan Maah (National Nutrition Month) pualin vawiin khan Lawngtlaiah kawng zawh (rally) buatsaih a ni.

Rally tan hmaa Lawngtlai DC pisa tuala inkhawm tawi buatsaihah SDO (Sadar) Pi Rochuangkimi Khenglawt chuan chaw tha ei loh vanga nu nau pawm leh naupangin an tuar nasa thin chu sawrkar chuan sut kian tumin theih tawp chhuahin hma a la reng a, Lawngtlai District chhungah pawh Social Welfare Department hnuaiah Anganwadi Centre atangin chaw tha (nutrition) sem chhuah reng a ni, a ti a. National Nutrition Month-ah hian nu nau pai leh nau pawmte'n chaw tha an mamawhzia leh anmahni tanpui chu khua leh tuite mawhphurhna a ni tih hriat thar a pawimawh hle a ni, a ti.

Vawiina Lawngtlaia National Nutrition Month rally-a telte hian nu nau pai, nau pawm leh naupangte'n chaw tha an tlakchham vanga an hriselnain a tawrh dan leh chaw tha an hmuh theih nana tan lakna tur thu ziak kenga an pho lan bakah, kawtthlerah an au rual bawk.