No.1608/2021-2022

Aizawl the 29th July, 2021 : Vawiin khan Deputy Chief Minister Pu Tawnluia hovin Department of Information and Public Relations (DIPR) Minister Pu Lalruatkima leh phai lam chanchinbu leh TV-a thawk Mizo journalist-te chu Mizoram pawna thudik puanchhuah leh thehdarh chungchangah kalphung tha zawk ngaihtuahin a pisaah an thukhawm.

Pu Tawnluia chuan tuna Mizoram leh Assam buaina chungchang a chinchhuaka a sawi hnuah State pawn media hrang hrang ten thil thlen dan dik tak an hriat chian a, an thehdarh theihna tura hmanraw pawimawh ber chu National Media Correspondent te an ni, a ti. Kan dikna leh thiam kan channa Mizoram chhunga kan hriat ringawt hi a tawk lova, khawvel hriata kan au chhuahpui a ngai tiin Deputy Chief Minister chuan a sawi a. Tun ang boruak chauh loah, hun pangngaiah pawh uar lehzuala National News ah Mizoram hmel a lan tam theih nan tan lak a tul a, chumi atan chuan rawtna te siam turin journalist te a ngen a ni.

Jounalist-te zawhna chhangin Deputy Chief Minister chuan ramri chungchangah sawrkarin ngaihdan nghet tak a nei a, tuna kan dinna ngai atanga tawlh kir a tum lo, a ti a. Ramri buaina chinfel a nih theih nan Sawkar chuan ama kaihhruaina hnuaiah Boundary Committee a din a, chu chuan hma chak takin a la chhunzawm zel dawn, tih sawi.

DIPR Minister Pu Lalruatkima chuan Mizoram leh Assam inrinaa buaina thleng mekah media lama inbeihna nasa takin a thleng a ni, a ti a. National Media a thawk Mizo Journalist te chu “kan hmachhuan in ni” tiin taima tak leh uar taka Mizoram dinhmun dik tak puangzar turin a fuih a ni. Amah ngeiin Vairengte leh Saihapui V a tlawh thu sawiin, thil thlen dan chipchiar tak meeting-ah hian a sawi bawk.

Meeting-ah hian Mizoram pawn media hrang hranga thawk Mizo Journalist te an tel kim hle a. Rajya Sabha MP hlui Pu Lalhmingliana pawh a tel a ni.