No.1607/2021-2022

Aizawl the 29th July 2021: Vawiin chawhma khan Dr.Lalhlimpuia, Chief Medical Officer, Kolasib chuan Govt. Kolasib High School, Project Veng chu hri kai natna langchhuak lo te enkawlna hmun Project veng 4C, Kolasib district-a a pariatna ni turin a hawng a, Pu Lallawmsanga Ngente, Chairman, VLTF Project veng chuan hun kaihruaiin, Zonal Exececutive Magistrate Pu Lallawmpuia Sawthly, SDO, PHED, Pu Hmingthanzuala, DIPRO leh Project veng khawtlang hruaitute an tel a ni.

Dr.Lalhlimpuia, CMO chuan Covid-19 hri kai, sawrkar enkawlna hmun 3C chhawk zangkhai tura Kolasib district-a a pariatna atan Project veng 4C din a ni chu lawmawm a tih thu a sawi a, natna langchhuak lo, inkhunghran ngaite chu mahni veng ngeiah, mahni vengpuite nen khunghran an nih chuan an thla a muan phahin, chu chuan an taksaah pawh a tha zawnga nghawng a neih ngei a rin thu a sawi a, hri kai khunghran mekte hian taksa damna bakah rilru thlamuanna an mamawh hle thu a sawi bawk a ni. 4C chu VLTF enkawlna hnuai liau liau tur a nih angin zawm tur hrang hrang awmte chu fimkhur tak a zawm turin leh a tul apainga thuneitute rawn thin turin a chah a, sawrkar nen tangho thiam a harsatna awm theite sutkian kawngah pawh tha tak a thawkho zel a pawimawh thu a sawi bawk a ni. 4C enkawl dan tur chungchang tarlangin Covid-19 hri kai natna lang chhak lo te chauh dah tur a nih thute, Natna lang chhuakte, ruihhlo ngai leh HIV positive-te, raipuar, cancer vei, Organ transplant tawhte chu 4C a enkawl tur an nih loh thu sawiin a awmte hriselna pawh ngun tak a thlithlai reng a tul thu a sawi bawk a ni.

Project Veng 4C hawnna hunah hian Pu Lalthianghlima, Vice Chairman, VLTF, Project Veng chuan 4C hawn a nih theih nana inbuatsaihna kalpui dan tlangpui tarlanna hun a hmang a, Pu Lallawmpuia Sawthly, Zonal Magistrate chuan thusawina hun hmangin Pu Vanramngaia, Leader, Team rawngbawlna, Project veng VLTF chuan tawngtaina hun a hmang bawk a ni.

Project Veng 4C ah hian mi 28 awm theihna tur a ruahman niin hmeichhia 12 leh mipa 16 awmna buatsaih a ni a. Mipa leh hmeichhia inthiarnate pawh felfai tak a thliar hran niin insawizawina hmunte pawh ruahman a ni bawk. A awm turte chu an khua a sik leh sik lohte, an Oximeter reading leh natna a lan chhuah leh chhuah lohte chu uluk tak a vil tur a ni a, ei leh in hi an chhungte pek tur niin an remchan loh chuan VLTF-te hian an ruahman sak dawn bawk a ni.

Project Veng 4C nen hian Kolasib district-ah 4C hi 8 a awm mek a, Kolasib khaw pawnah Vairengte, Hortoki leh Lungdaiahte awmin Kolasib khaw chhung Hmar veng, Venglai, College Veng leh Vengtharahte a awm a ni.

Attachment

  • Loading attachment...