No.4364/2021-2022

Aizawl, the 22nd March, 2022: Vawiin khan Deputy Chief Minister Pu Tawnluia chuan a enkawl Department pahnih UD&PA leh PHE Department kaltlanga Champhai leh a chhehvela hmasawnna ruhrel siam leh hmachhawp hrang hrangte a enfiah. District Hospital Champhai leh nizana Champhai Kahrawt Venga kangmei chhuak tuartute leh hnatlangte a tlawh bawk.

Deputy Chief Minister chuan hna tlo leh tha tak, nakin zel thlenga chhawrnahawm leh rotling siam a pawimawh thu sawiin, hmasawnna ruhrel thawh mek leh hmachhawpte chu hlawm lian takte a nih hlawm a avangin a tahtawl zelin a hlawhtlin theih nan ngaihtuahna sen mek zel a ni, a ti a. Hrileng vanga harsatna awm karah pawh sawrkarin hmasawnna ruhrel siam kawngah a theih ang zela tan a lak thu sawiin, hnathawktu leh viltu department hotute chu project puitlin theih nana thahnemngai taka thawk thin turin a chah a ni.

District Hospital Champhai a tlawhnaah Deputy CM chuan thu sawiin, mipui hriselna leh hripui leng dolet kawnga Health Department thawktute inpekna fakawm tiin, an hlutna a tihsan hle a a hriat thu a sawi a. DP&AR changtu ni bawk chuan Sawrkar Department hrang hrangah thawktu indaihlohna a awm thu leh restructuring committee din niin zirchian chhoh mek a nih thu a sawi a. Hrileng vanga hna lak tur tam takte khaihlak a awm thu sawiin, thawktute chu hrethiam hram hram turin a ngen a. District Hospital Champhai chu Undivided Champhai District-a damlote pan tam leh Border area a awm a nih avangin sawrkarin a ngaihpawimawh thu a sawi bawk.

Champhai North bialtu MLA Dr. ZR Thiamsanga, Vice Chairman, Health & Family Welfare Board chuan Champhai District-a Health infrastructure tihchangtlun ngaihna leh khawtlang hmasawnna tura mamawhte a tarlang a. Covid-19 hrileng do kawnga District hotute leh mipuite hmalakna fakawm tiin, thawktute chu thahnemngai taka thawk turin a fuih a ni.

Deputy Chief Minister hian Champhai Ring Road project hnuaia hmalakna Tlangsam khua paltlanga Zotlang atanga Zote inkalpawhna kawng sial te, Zotlang Truck Terminal, Solid Waste Management Centre Mualkawi, Keilungliah lui khuah, PAHOSS hnuaia Parking House Site siamna tur hmunhma Champhai Vengthlang, Champhai Vengsang Bazar siamna tur te, Hospital Road kawng laih leimin avanga harsatna awmte leh District Hospital Champhai te a tlawh bakah, nizana Champhai Kahrawt Veng Thlerpuia kangmei chhuak tuartute leh hnatlangte a tlawh tel bawk a, hnatlang thingpui lum nan Rs. 10,000/- a hlan a ni.

Champhai Ring Road project kaltlang hian Zotlang atanga Tlangsam panna kawng laihna atan Phase 1 hnuaiah cheng nuai 307 dah niin, kawng laih thui zawng hi kilometre 3.5 leh metre 8 a zau a ni a, Tlangsam atanga Falpuikawn thleng km 1 chu metre 5.5 a zauin white topping tih zawh tawh a ni bawk. Phase 2 hnuaiah Tlangsam to Zote inkar cheng nuai 103 senga laih leh cheithat hna thawh tur niin, tender chhuah tura hmalak mek a ni. Phase 3 hnuaiah Tlangsam to Zote inkar laih hna cheng nuai 35 senna tur thawh mek a ni bawk.

Cheng nuai 500 senna tur Zotlang Truck Terminal siam hna thawh, hun engemawchen khaihlak pawh ram neitu nena sawihoin naktuk atanga hnathawh chhunzawm leh nghal tura inrem a ni a. He hna hi za zela 20 vel chu thawh zawh tawh a ni. Mualkawi rama Solid Waste Management Centre siam nan hian cheng nuai 408 ruahman a ni a, hmunhma cheina, Water Tank, Waste Resource Management Centre, a panna kawng leh a chhung kalna kawng siam nan cheng nuai 92 hman tawh a ni a, hna hi za zela 50 vel zo tawha chhut a ni a, peihfel a nih hmaa hnawm paih lailawkna tur siam thuai tum a ni bawk.

PHE Department hnuaia Non Lapsable Central Pool of Resources, NLCPR (DoNER) kaltlanga cheng nuai 1,988 senna tur, Champhai khawpui sira luang Keilungliah Lui khuah (Construction of Dam Reservoir and Development of Recreation Centra at Keilungliah, Champhai) hnathawh mek pawh a tlawh bawk a. Lui khuah tur san zawng hi metre 20 niin, tunah hian metre 19 vel thleng chu khuah zawh tawh a ni a. A bulthut khuah chhah zawng hi metre 14 niin, zuih chho zelin a chhipah metre 4 a chhaha khuah tum a ni a. A bulthut khuahna thui zawng hi metre 54.61 niin a chung lamah chuan metre 102.60 a ni dawn a. A panna kawng leh fankual velna tur kawng pawh ruahman tel a ni. Kum 2018 atanga bultan Keilungliah khuah hna March, 2020 a zawh tur ni mah se rokhawlhna a awm avangin hun tiam chhunga zawh hman a ni lova, kum hnih atan pawhsei a ni.

Keilungliah Dam khuah mek hi sq.m 1,34,826.42 a zau ram tuam tur leh tui litre nuai 32,000 tlinna tura ruahman niin, Champhai khawpui tui mamawh phuhruk nan leh leilet phaizawl buh leh bal chawm nante, khualzin hipna tur, Sangha khawina leh Champhai khawpui timawia boruak lum tiziaawm thei tura ruahman a ni.

Deputy CM Pu Tawnluia hi Dr. ZR Thiamsanga, MLA, Health & Family Welfare Board Vice Chairman; Pu C.Lalmuanpuia, MLA, Veterinary, Fishery & Sericulture Board Vice Chairman; Pu Henry C.Lalrawnkima, District Bawrhsap; Pu Lalrinpuia Varte, SP; Pu Lalhmachhuana, SE PHED; Pu Lalnunfela Chawngthu, SDO Sadar; Pi R. Lalnunkimi, DUDO; Pu C. Malsawma, EE, UD&PA Department leh Official dangten an tawiawm a ni.