257/2023-2024

Tlangpui, 28th April, 2023 : Deputy Chief Minister, PHED Minister ni bawk Pu Tawnluia chuan vawiin khan nizung chakna hmanga tui lakna "Tlangpui/Tlangmawi Water Supply Scheme (solar pumping)" cheng nuai 551 senga sak chu a hawng. Deputy Chief Minister hian Tlangmawi khuaah ribbon chep chatin he scheme hi a hawng a, hemi puala inkhawm Tlangpui Community Hall-a neih ah khuallian a ni chhunzawm bawk a ni.

Tlangpui Community Hall-ah thusawina hun hmangin khuallian, bialtu MLA ni bawk Pu Tawnluia chuan Tlangpui leh Tlangmawi khua ten tui intur thianghlim hnianghnar taka an tlan thei tawh tur chu a lawmpui takzet thu a sawi a, thalah pawh tui harsatna an tawk lo turah a ngaih thu a sawi bawk a ni. Heng khaw pahnih mipuite tanrualna leh thawhhona tha a hmuhin lawmawm a tih thu sawiin, he hun hi an hnena malsawmna thlentu ni chhunzawm zel se a duh thu a sawi bawk a ni. In tinin tui litre 38 tal an nei thei vek tura ngaih a nih thu sawiin tui hi renchem tak, daihzai tak siin a hman theih tih kan hriat a tul a ni, a ti a. In tinin mahni inchhungah ngei tui an herh haw thei ta chu a lawmpui takzet tih a sawi bawk a ni.

Tlangpui leh Tlangmawi khua chawmtu tur Ni zung chakna hmanga tuilak hi Jal Jeevan Mission (JJM) 2021-2023 hnuaiah Cheng Nuai 551 senga thawh niin, July ni 26, 2021 atang khan thawh tan a ni a, December ni 26 2022, kum hnih chhunga thawh zawh tura ruahman chu hun bitiam hma hret December ni 16, 2022 khan thawh zawh a ni a; heng khaw pahniha in tinah tui hi pipe hmanga pek vek a ni. He project hi mihring 1373 leh chhungkaw 228 chawm zo tura ruahman a ni.

Tlangpui leh Tlangmawi chawmtu tur Tuibel lui tuilakna atan hian 65mm GI (M) Pipe leh 80mm GI (M) Pipe hman niin, tui tihthianghlimna Water Treatment Plant atangin Tuidahkhawlna reservoir lian litres 1,00,000 dawng 1 leh litres 40,000 theuh dawng 4 a awm a, tui lakna kawng hi stage 3 ah then niin stage tinah hian control room a awm theuh a ni.

Ni zung chakna hmanga metre 798 zeta sanga tui pump hna thawktu contractor hi Rhb General Enterprise an ni a. Funding agency hi NABARD RIDF-XXVI a ni. Nikhat chhunga tui lirtres 66,000 pump thei tura ruahman a ni a, tui lakna atan hian Ni zung chakna lakna tur, Solar Power Plant 335 W bun niin, stage-I ah 58.96 kWp, stage-II ah 57.29 kWp leh stage-III ah 60.30 kWp bun a ni a. Solar panel hi stage-I ah 176, stage-II ah 171 leh stage-III ah 180 bun a ni bawk.

Tlangpui khua ah hian in 169 awmin mihring 1000 vel an cheng a, Tlangmawi khua ah hian in 48 awmin mihring 250 vel an cheng a ni.

Tlangpui/Tlangmawi Water Supply Scheme (solar pumping) hawnna inkhawm hi Er. Anup Chhetri, Chief Engineer, PHED Zone-II in a kaihruai a, Er. Thanchungnunga, S.E., PHED, Champhai WATSAN Circle in technical report a pe a ni. Khawzawl bawrhsap Pu K. Lalrohlua, Tlangpui leh Tlangmawi Village Council President ve ve ten thu an sawi a, Er. Liantluanga Chohte, E.E., PHED, Khawzawlin lawmthu sawiin hun a khar a, khaw pahnih huapin ruai an theh bawk a ni.